2008年1月31日星期四

SICK LEAVE? (2)

CK答大口仔,話佢覺得大家都太過focus響個「病假」既真偽上面,佢既做法係俾MESSAGE同事,大家成年人要互相信任,不過如果太多病假佢都會對員工有冇足夠體力去應付工作。CK話員工收到呢個MESSAGE病假會少D。

首先多謝CK既分享,不過大口仔既情況其實同CK有D唔同,CK係真金白銀請伙計既中小企老闆,大口仔係受僱於銀行既管理人員。大口仔覺得好似我呢個階段既管理人,面對員工,面對自己既上級都有好多制肘。點樣技巧地帶出SICK LEAVE既問題俾員工又唔影響士氣呢?大口仔到今日都覺得係一種藝術。

暫時大口仔對SICK LEAVE問題既處理辦法同CK類似,就係"咁大個人唔該自律啦"。我會多D關心佢地既身體,跟進佢地既病情,等佢地識得自我調節。

2008年1月30日星期三

匯豐 (5) 續

噚晚提到匯豐除左CULLINAN同ASSCHER兩間SIV外,仲有經營其他四間類似SIVo既公司,持有超過200億(美元,下同)資產。你聽左,係咪嚇一跳?你可能會問匯豐乜唔係得兩間SIV咩?

大家唔駛驚住,驚之前都要了解左先"識"得驚。以下我會引用匯豐公佈第三季業績時既"業績公布前最近業務狀況"既其中兩段,再同大家分析其餘四間公司同CULLINAN同ASSCHER有乜分別。

以下係引用文字:

本集團的主要保薦管道投資公司SOLITAIRE、BRYANT PARK、REGENCY及ABINGTON SQUARE均包括在資產負債表入賬。這些公司的資金狀況令人滿意,亦無出現資產減值。由匯豐管理的兩項資產負債表外結構投資公司CULLINAN同ASSCHER,亦已備妥必要的資金安排。作為結構投資公司的管理人,我們在市場波動期間,仍繼續積極與收益票據和優質票據持有人合作。雖然在本季度結束之後,有兩間發行資產交予結構投資公司持有的金融機構被降低評級,但結構投資公司的資產仍維持高質素。

本集團直接持有的以美國次優質按揭作抵押的債務抵押債券(CDO)數額不大,故自第三季度結束以來,縱使多家金融機構已披露需就此類資產而作進一步鉅額撇賬,本集團並無需要作出此類披露。

大口仔觀點:

匯豐其實係第三季度業績已經好清楚指出佢"擁有"四間管道投資公司(CONDUITS - SOLITAIRE、BRYANT PARK、REGENCY及ABINGTON SQUARE),其資產負債已經包括o係匯豐資產負債表內,一直都有入賬反映。除此之外,匯豐當時亦"管理"兩間資產負債表外結構投資公司 (SIV -CULLINAN及ASSCHER)。

如果大家記得,匯豐年初宣布注資350億入兩間SIV時,佢地既講法係將兩間SIV納入匯豐既資產負債表(大口仔既講法係借錢俾佢地)。但另外四間管道公司就好唔同,因為佢地已經係匯豐既資產負債表之內,佢地係匯豐全資或者係以類似既形式擁有。簡單黎講,你當o個四間管道公司係匯豐既子公司看待都勉強可以。

問題係,o個四間公司有冇持有次按相關資產呢?第二段引文已經好清楚指出,匯豐"直接"持有以美國次優質按揭作抵押的債務抵押債券(CDO)數額不大,根本無需要好似花旗、美林般作出有關披露。無直接次有CDO,即佢直接"擁有"既四間"子公司"都無大額持有CDO。

無直接持有,咁間接呢?間接有呀!咪就係兩間SIV囉!據報匯豐佔兩間SIV2%股權,其餘98%由其他中大型金融機構持有。我好相信呢兩間SIV有持有CDO,跟住由於市場資金緊絀,CDO定價困難,匯豐估計短期內根本唔會解決到,就索性"借"錢俾兩間SIV避免賤賣資產。

為左進一步了解管道公司既運作,我睇左一份HSBC SECURITIES (USA) INC有關管道公司BRYANT PARK既文件。裡面提到BRYANT PARK會發行COMMERCIAL PAPER或者MEDIUM-TERM NOTE集資,然後將資產借俾其他符合佢地貸款資格既公司,單一貸款金額唔可以超過管道公司資產20%,抵押品可以係應收賬或者係金融資產。大口仔相信呢類型貸款既對象一定係大型公司,貸款額會好大、借款人質素好但管道公司收取利息相對較平。

總之,唔係CDO,唔好乜都入CDO、次按數....

2008年1月29日星期二

匯豐 (5)

美國業務問題 - 匯豐仲有冇SIV持有CDO?

網友無名氏問大口仔,匯豐除左早前注資結構投資公司CULLINAN同ASSCHER持有CDO外,仲有冇其他SIV公司?如果有,咁呢幾間SIV公司又有冇持有CDO呢?好問題!大口仔亦都唔明白點解市場上咁少人識得問或者主動分析呢個問題。

如果大口仔話俾你聽,匯豐仲有4間類似SIVo既公司持有超過200億美元資產組合,你驚唔驚?

本來想今晚寫一篇有關呢個問題既文章同大家分享,但又唔想草草幾筆了事 (今晚又九點放工!痴痴地)。不如咁,大家用少少時間睇下匯豐公佈第三季業績時既"業績公布前最近業務狀況 (Pre-close Trading Update)"。我聽晚再同大家詳細分享,有高手在場亦歡迎指教。

待續....

2008年1月28日星期一

早知早兩日買匯豐?

馬沙話恆指大幅反彈後佢聽得最多的一句說話就係「早知早兩日買匯豐」。佢認為匯豐即使今個星期再見105蚊,講o個番說話既人都係只"想買"、而"不會買"。

哈!又會同大口仔既經歷咁似既?話說我上星期五準備收工之際見到兩個同事仔圍圈咬耳仔,聽到佢地細聲講大聲笑,以為佢地講乜?點知又係股票經(o個日大跌2000點時,個個面青青無心機做野,又粒聲唔出,依家又眉飛色舞)。

同事A話"早知早兩日105蚊成副身家買匯豐啦,應該借孖展tim呀!"。同事B跟住附和"我都係咁話,我o個朝唔係要開會?一早入左兩手!"。講完又繼續討論中人壽、中移動、招行等等股票,兩個都即時股神上身咁款。

呵,今日股票又跌千點,唔知呢兩位股神同事仔會唔會心郁郁又"話"想入貨呢?大口仔覺得呢兩位"股神"多數又會因為"開會"、"忙"、"禁左制唔記得SAVE"或者"未申請孖展戶口無得當抵褲"去買匯豐居多....算吧啦你地....

各位山賊兄弟,準備好未?入貨信號可能又再響起!

2008年1月27日星期日

流灠人次"100"

大口仔筆記單日流灠人次首次超過"100",感謝各位扑友支持!

SICK LEAVE?

大口仔既銀行工作生涯自去年初開始要管人(大概12人),經過半年洗禮,開始發展緊自己既一套管理心得。

但有一個問題由始至終都令我好頭痛覺得解決唔到,就係面對經常(一個月3-4日)借故SICK LEAVE既員工....我雖然知道佢地假病機會好高 (噚日SICK LEAVE今日又龍精虎猛),但又唔可以當面指正,咁可以點呢?

有冇扑友可以指教下?

匯豐 (4)

匯豐主要業務優勢

匯豐140年來經歷過無數轉型,從香港成立之初為歐商做存貸生意,到滿清時期向清政府放貸以鹽稅作扺押,再到以香港為基地,收購恆生、收購歐洲金融同業、收購HI而進入美國市場。匯豐由一間保守、重商譽的傳統存貸銀行,發展到今日以個人財務管理、企業貸款貿易、跨國企業資產管理及保險務財為業務重點發展。

個人財務管理

匯豐以存貸服務起家,由於當時實行利率管制協議,存貸服務的利錢好深。匯豐憑藉良好既商譽於香港建立起一個龐大的客戶群。後來利率管制取消,匯豐轉而大力發展個人財務管理業務,為客戶提供各種理財產品,從而賺取佣金、成為一間理財產品既超級市場。

由於客戶基礎龐大,令匯豐向各大基金爭取佣金分賬上有明顯優勢,情況與百佳惠康同供應商既關係類似。匯豐一方面收取基金公司既"上架費",另一方面又收取客戶購買基金時既佣金,利潤其實比美從前的存貸業務,非常和味,而且呢種收入風險相當低 (與貸款業務不同)。


video

由於匯豐經營點遍佈全球,所以呢個超級市場銷售平台係全球性既優勢。理論上所有個人理財產品都可以供全球客戶選擇,形成一個龐大既跨區分銷中心。近年匯豐積極發展PREMIER BANKING品牌,如果你係PREMIER BANKING客戶,你一個戶口號碼令你無論去到中國、法國、美國或者非洲都會得到一致既個人銀行服務,包括理財、樓按、信用卡、私人貸款、股票買賣服務等等。

PREMIER BANKING統一品牌去經營,情況同麥當勞既經營手法幾類似。相同既服務水平、類似既產品服務都令到客戶無論去到世界邊個各落都會放心同舒服咁選用匯豐....配合匯豐網上銀行平台,客人無論何時何地都可以同時管理名下所有戶口資金,睇到自已存款、股票、基金、強積金、信用卡結餘、樓按結餘,甚至即時購買保險產品,試問呢種服務邊間銀行做得到?近幾年國內、或者歐美投資者都湧到香港開設戶口,投資港股同基金,就正因為匯豐既科技同經營平台配合到佢地既投資需要。

匯豐於2007年將PREMIER BANKING品牌統一,我相信呢個綜合平台優勢將會越來越明顯,因為當今各大銀行有能力提供類似服務水平既,除匯豐外別無他選。一個可以為客人提供各式各樣理財產品、全球性為客人服務既平台,賺錢能力無容致疑。日後中國開放資本市場,如果你係歐美投資者想入國內發展,或者你係國內同胞想到香港或國外投資,你會點揀?

2008年1月25日星期五

入市?

連續兩日回升千點,你有興趣入市嘛?

如果會,點解兩三日間你既睇法會咁唔同既?正常人會等大減價先會大掃貨,包括衫、褲、鞋、自助餐、PSP等等,但唔包括股票。

中國人壽26蚊你唔買,係要33蚊升緊你先覺得抵,其實你係咪心理有問題?如果你都有呢種病態,請你遠離股市,呢道唔適合你玩。

匯豐各主要業務分析將於週末(希望....)上載。呢排日日做到9點幾,想死....

2008年1月23日星期三

狼市

林森池先生2007年尾話依家香港股市係狼市,意思話上落好快,波幅亦好大。呢兩日完完全全體會到呢種講法。

當匯豐可以一日波幅超過10%,仲要係連續兩日一日升一日跌,你可想而知呢個市幾“狼”!

其實呢兩日心情好好,見到匯豐同其他心怡股票跌到四腳朝天,心裡面就計緊幾時入貨,可惜美國突然減息0.75%,股市反彈得太快,只係入左匯豐一隻愛股。不過我相信股市仲未跌完,經濟短期唔係減息可救,放長雙眼睇啦!

只要清楚自己既股票,你乜都唔駛驚。

致眾"山賊"

各位噚日有份打劫匯豐既兄弟,恭喜大家凱旋而歸!

畢基兄就勁啦,2400x11.2=26,880!!!

黎....乾杯!

2008年1月22日星期二

趁火打劫!

網友山芭佬話佢今日趁火打劫了匯豐,我話佢係趁火打劫左因為唔認識自己股票已拋售持股的投資者先o岩。

面對歷來最嚴重既恆指跌幅,唔知你有咩應市策略呢?

匯豐今日跌左$9.2,你有咩感覺?大口仔除即諗到現價買入匯豐既股息會去到6.5%,又諗到匯豐每年盈利足夠應付今次次按損失,佢會一如已往,繼續為股東賺錢。

大口仔今日宣佈會為投資組合增持匯豐,同山芭佬及其他所謂大戶一齊趁火打劫。嘿嘿!

2008年1月21日星期一

匯豐2008年最低股價?

各位網友,大口仔先兩日整左個“匯豐2007年最低股價?”投票俾大家玩下....

呢個投票會由現在直到3月2日匯豐公佈2007年全年業績前夕為止。當晚我會根據投票結果對匯豐公佈業績後第一個交易日股價作短期走勢預測。投票、分析純屬試驗性質,希望可以增加同大家既互動性,當然亦歡迎各位留言發表對匯豐業務既意見。

2008年1月20日星期日

匯豐(3)

美國業務問題 - 350億救SIV=血本無歸?

好多人關心匯控上年尾宣布為左拯救旗下兩家SIV公司,為佢地提供最高多達350億(美元,下同)的流動資金及定期融資會血本無歸。大口仔為大家分析呢個問題之前,大家就先要了解何謂SIV。SIV是花旗集團於80年代後期係倫敦最先創立的,佢地通過發行短期商業票據或中期債券獲得現金﹐然後用借返黎既現金用來購買高收益資產,包括銀行債及美國抵押貸款證券等等。 一般SIV以摃扞式運作,即用1蚊本借9蚊再買10蚊資產。如果所買既債券收益高於借貸成本(如1%),咁收益就會有約10%。好過去搶....

因為早兩年次按相關產品大行其道,為投資銀行同其他金融機構提供左看似回報高風險低既投資工具CDO (Collateralized Debt Obligation)。大銀行如花旗、美林同匯豐都透過成立SIV為佢地既企業銀行客戶管理同投資CDO。由於回報高,風險係美國房地產市道好既時候又相對低,所以呢個市場發展得非常快。

匯豐亦有參加呢個市場。佢管理兩個SIV公司,為其企業客戶管理多於650億既抵押投資工具。呢650億大部分係由市場以低息集資購入。本來相安無事,短期商業票據或中期債券市況良好的情況下SIV公司非常容易獲得資金去繼續其低借(錢)高息(收入)呢個遊戲。不過好景不常,去年年尾因次按問題令到信貸市場緊張,連帶短期商業票據或中期債券市場借錢非常困難,就算借到都好高息。SIV借既係短中期錢,到期還錢又借唔到新錢咁點算?唯有賣資產囉。

但因為舊年尾開始市場上對所有抵押債券產品都敬而遠之,即使高質素資產都無人想要。匯豐旗下兩間SIV都唔例外。咁點算呢?匯豐管理層深知短期商業票據或中期債券市場短期內唔會好轉,又唔想旗下SIV賤賣資產,於是想出一個方法 ─ 用自己既資金借俾呢兩間公司。

唔知大家知唔知,係銀行既角度,借錢出去俾人既錢叫ASSET(資產),客戶既存款叫LIABILITY(負債)。出面好多人誤會左匯豐用350億去買SIV450億資產,先要將SIV資產併入資產負債表。但我認為匯豐只係為SIV提供短期商業票據或中期債券去維持SIV運作,簡單講只係借錢俾SIV,而唔係買佢地既資產。當然,借錢俾人當然要有"渣拿",係乜?咪就係SIV既450億資產低押返俾匯豐囉!

你會話,車,咁咪一樣,但實情係好唔同。如果匯豐係買左SIV既資產,如果批資產因為市況問題價格繼續下跌,匯豐係要撥備的。雖則話350億去買450億有100億水位,但因為今年初市況實在太差,即使有100億水位仍然有可能要大幅撥備。不過如果只係借錢俾SIV又唔同,匯豐用350億LIABILITY(例如存款)去借350億ASSET(債權)俾SIV,即使SIV資產繼續下跌,匯豐只要相信SIV唔會有太大違約風險,佢地都無需為佢提供既350億貸款做任何撥備。咁你又會問,D資產係咁跌,SIV既股東會唔會唔還錢呀?答覆係有機會,但機會好微,因為匯豐旗下兩間SIV公司既股東都係大型金融機構,佢地唔還錢等如佢地破產先會。市況係壞,但出現金融機構倒閉既機會仲係好微,英國NORTHERN ROCK都有英國政府救啦,好難死得去。

結論係,匯豐呢350億借左俾一班因為市況不明唔想賤賣資產既有錢佬。要匯豐蝕哂呢350億就要呢班有錢佬破哂產,同埋佢地所持有既抵押品都無哂價值先會,而匯豐借俾佢地既錢仲要有息收架!血本無歸?你話呢?

回應網友:肥魚爸爸

大口仔相信直接由次按引起既損失匯豐已經處理得七七八八,不過未知數係由次按引起既其他經濟問題。

匯豐將350億SIV資產的做法係佢地帶頭做起的,好多人話佢會將呢350億蝕哂,呢個係好武斷同無知既講法,至於PERMIER戶口正正就係匯豐強大網絡背後所產生既經營專利,下一篇匯豐分析系列將會提到上述SIV問題同匯豐各項主營業務優勢,不過要俾少少時間我,銀行工作壓力迫人,星期日都要做公司野呀....

2008年1月19日星期六

平保配售A股、匯豐賣恆生?

請大家睇清楚個“?”....

個標題唔係新聞而係推測!平保於1月18日發新聞稿,表示有意配售1,200,000,000A股同發債集資412億﹝人民幣下同﹞。整個交易平保大約可以集資1600-1800億 (來源:永恆新世界 - Forever)。

Forever作左一個好大膽既估計,佢認為呢次可能係匯豐系既重組,,配合匯豐在A股上市。匯豐會成為平保大股東,匯豐會賣恆生俾平保。計劃一石幾鳥:平保得到恆生的業務加網絡;恆生可以加快發展國內市場;匯豐成為平保大股東進一步擴展其中國藍圖。

睇完,第一時間覺得有少少天馬行空。第二時間諗起舊年有個銀行行家提過,有國內行家同佢講過,匯豐有機會賣恆生俾國內某間中資金融機構,換取國內銀行控股權。Forever既講法同我個行家既講法有二曲同工之處。

不過,大口仔覺得匯豐賣恆生俾交通既機會大過平保。而平保入股交通既機會又大於匯豐。點解?其實匯豐管理層多次提到同交通既關係比平保密切,而匯豐一直最想得到既係國內龐大既分行銷售網絡。匯豐既心頭好一定會係交通而非平保。

基於上述假設,我覺得除非賣恆生係同增持交通有關,否則匯豐係唔會賣恆生的。如果要由平保配售A股估起,最合理既估計係平保現金加股票入股交通,再交通用現金加股份買恆生,令匯豐直接或間接透過平保持有交通超過或接近50%股份。若中國容許匯豐作為第一間外國企業於上海A股上市既試點企業,股份交換極可能於中國實行。但以H股作為交易市場亦都可行的。

上述假設有少少幻想成份,但諗起上黎又合情合理。結局係平保可透過交通加強其國內綜合金融集團既發展;交通擁有恆生銀行香港既分行網絡及經營個人銀行業務經驗;匯豐可以通過中國監管將交通收歸旗下,於中國上海A股上市,大大加強其發展中國市場既力量。

匯豐 (2)

提到匯豐銀行,多數人第一時間諗起“有買貴、無買錯”,跟手又彈句“140蚊一股咁貴點買呀?”。當然,呢兩句說話係一年前都仲適用於普羅大眾對匯豐既印象。但到左今日,你仲會唔會咁諗?如果你買左匯豐,你可能心裡面暗暗咁後悔當初點解就單單因為呢句“有買貴、無買錯”而買入,你會覺得自己錯失左兩年既投資機會等等....

好奇怪,香港(一般投資者)從來都好少有談論匯豐既具體業務情況,大家通常最關心佢幾時分拆 (因為140蚊一股好貴?)同埋佢今年加幾錢人工俾員工 (通常都答有得加,會跟隨通脹,答案悶到爆)。藉住今次次按事件,我諗大家都應該花少少時間了解我地香港呢間大笨象仲買唔買得過。

基礎業務、競爭優勢

作為一個銀行小蕃薯 (無論我係匯豐人或競爭者),我對匯豐既經營專利有好深既感受。早於90年代,匯豐係前大班龐約翰既領導下作出投資亞洲、歐洲同美洲,三分天下既決定。呢個決定令匯豐建立起自己既全球金融網絡。呢個網絡令匯豐經營幾個主要業務既時候有好大優勢。

匯豐既主要業務圍繞個人、企業、私人銀行,近幾年亦非常積極發展投資銀行及保險業務。行內人都知道,匯豐既客人,無論係個人客戶或者企業客戶,通常都好樂意同匯豐既代表打交道。更加有個講法就係好多匯豐既客都係一路鬧(收費貴、排隊耐)一路用匯豐既服務。點解會咁?因為匯豐既網絡提供到完善既服務俾客戶。呢個優勢令匯豐贏到好多其他銀行無可能或更難做到既生意。

之後提到匯豐各主要業務既時候,再詳細講下呢個網絡點樣幫大家(如果你係匯豐股東)一路賺錢一路俾人鬧。

美國業務問題

但係為左呢個網絡,匯豐買入左好多睇黎非常昂貴既公司,當年買HOUSEHOLD (HI)就有人話匯豐走錯路,亦歸咎於現在匯豐既次按問題係由當年既收購引起。但事實係,當年買入HI後,美國樓市見底回升,令到美國匯豐隨後兩三年都賺大錢,亦為大象建立起剛才提到既完善網絡、同形象 (呢點好緊要)。其實HI令匯豐發生問題,最重要係當年匯豐無手起刀落咁處理HI前高層,仲放權俾呢班人管理美國業務,做成05、06年匯豐融資係美國樓市轉壞前仲大手透過按揭經紀買入大量資按組合、成為今日問題既致命傷。

咁究竟次按問題會唔會令匯豐步入萬劫不復之地呢?

我睇未必。匯豐現任行政總裁紀勤係2007年中期業績報告內,表示期內匯豐美國貸款組合下降80億(美元,下同)至414億,咁呢414億既貸款組合出現問題,又會唔會全部蝕哂呢?如果你對按揭貨款有認識,你會知道所謂按揭貸款,實際上係有樓宇抵押的,係香港貸款比率唔可以超過七成。

美國呢?我當次按貸款組合貸款比率其高,十成按揭好未?又當你414億既美國樓以六折大酬賓,匯豐呢方面既潛在損失係165億。165億好驚人?但你要知道以上假設係當全部次按貸款人都唔還錢,仲要美國樓全部都係跌六成先會出現。實際呢?最新11月次按拖欠比率係16-18%。如果你將414億 X 20%(當五份一人唔還錢) X 30%(當美國樓跌三成),你大概會計到匯豐既損失係24億。

24億既損失相對於匯豐舊年接近200億既盈利,雖然唔可以話係小數目,但絕對唔至命。當然,你可以質疑上述假設,情況可能會比我既假設更壞,但就算你將上述假設改變,損失假設去到50億又如何?你要知道匯豐第三季已經做左48億既壞賬撥備,比上述假設既損失多一倍左右。

上星期花旗銀行同美林為次按相關投資作出巨額撥備,匯豐又需唔需要呢?因為匯豐係第三季業績已經清楚指出次按相關衍生工具及債券投資不多而無需作額外撥備,所以我個人估計匯豐2007年因為美國經濟環境轉壞而要提高撥備金額到60億左右,但撥備係貸款組合相關撥備,同花旗及美林直接投資CDO既損失情況有根本性既唔同。當然,我呢D二打六既估計你只可以信半成,一切到左三月三日全年業績自有分曉。

嘩,大口仔勁長氣,一口氣寫左咁多好攰喇,下次再寫匯豐既管理層、各業務既競爭優勢同自己對匯豐投資價值既分析…

2008年1月17日星期四

左一巴、右一巴

請問你有冇係恆指跌到今日低位24000點放左你既心頭好?

噚日如果你因為恐慌,又唔了解自己所買股票﹝包括匯豐﹞而將自己既股票低位賣左,真係喊得一句句。你知點解今日匯豐升,噚日又跌既原因嘛?

俾人左一巴、右一巴咁"醒",感覺真係唔係幾好受,如果要自救,做個快樂既股東,你必須認識你既股票﹝包括匯豐﹞。

今日匯豐升4蚊我好開心,聽日匯豐因為美林第四季蝕100億而跌,我一樣開心,因為我可以買得平D,因為我認識我所買既股票。

SORRY,銀行工作太忙,又唔可以偷懶得太過明顯﹝因為要做到退休﹞,匯豐既詳細分析要到週末....

2008年1月16日星期三

恐慌?

今日既恆生指數拋售情況叫唔叫恐慌?

匯豐一道跌至114蚊水平,創三年半新低,作為匯豐既你,驚唔驚?
驚就唔該快D放哂佢,只有當所有人都跌到腳軟既時候,匯豐先可以見底回升....

如果你係匯豐股東,大口仔想請問下大家清唔清楚匯豐既業務係點?買匯豐既時候除左心中唸唸有詞諗住"有買貴無買錯"之外,仲有冇其他?

要做個樂觀投資者,除左真係要有樂觀性格,我諗投資人究竟清唔清楚自己買左乜都好關鍵。我清楚匯豐,我樂意以更低既價錢買入我清楚既匯豐。

2008年1月15日星期二

匯豐

身為銀行從業員,我深明匯豐係市場上既經營專利。我唔明點解匯豐美國會攪成咁,我只係知道,撥備可以回撥、股價跌可以升返,但匯豐既經營專利並無消失。

我既股票投資組合超過60%係匯豐,每月月供匯豐3000大元,平均買入價係$140,持有兩年由賺變蝕。咁代表乜?咁代表我可以用更平既價錢去收股票、去月供匯豐等等....

市場先生叫大家要做個樂觀既投資者,但我深信做到既人唔多....我亦樂於見到咁少人做得到,等我呢個銀行二打六可以有機會做大少少既匯豐股東。

週末我會花多少少篇幅寫下我對匯豐既睇法....

2008年1月12日星期六

大口仔筆記

先自我介紹....

大口仔個口好大,好鍾意講野,間唔中有自己既睇法,好鍾意逆向思考。我認為多數人諗到既野都無價值,一定要比人地早睇到趨勢先有用。

我係一個小小既銀行職員,剛剛建立左一個屬於自己既家,亦開始一步一步建立自己應該有既生活方式、生活態度。

呢個BLOG建立於一個我認為係風雨飄搖既日子....內容會關於我既銀行工作、我對政治既睇法、我既投資取向等等....我個BLOG會經常提到自己既估計或者睇法,非常主觀,不喜勿看!

Related Posts with Thumbnails