匯豐2007年業績分析 (3) - 個人理財

要評估匯豐2007年個人理財業務表現，大口仔傾向用“未扣除貨款減值及其他信貸準備之營業收益剩額 (減值前收益)”。點解？因為銀行好多時都會傾向作出最保守的撥備或撇賬，嚴重影響了數字的可讀性。用上述數字主要知道其實匯豐於美國的生意情況如果，業績差係因為無生意定全因撥備太高？

先睇匯控集團盤整體數，個人理財業務2007年減值前收益有514億(美元，下同)，比2006年的422億，同比增加21.8%。單睇北美洲呢？減值前收益有230億(美元，下同)，比2006年的219億，同比增加5%，亦有寸進。數字說明匯豐個人理財業務整體上的增長步伐(撥備前計)同其他業務一致，約20%左右。個人業務利潤於2007年倒退42%全因高撥備所致。

大口仔引用上述數字，唔係想篩選有利匯豐的數字先同大家講，我絕對認為投資者應視撥備為經營個人理財業務的成本，所以整體黎講，匯豐的個人理財業務是確確實實地倒退的。但係，大家亦要同時注意匯豐在美國經營的生意並無少到，匯款收費、樓按貸款利息及信用卡收費等照賺。簡單講，生意做多左，但因為有一樣生意俾人走左數，要準備錢預左輸盤帳先賺少左。

大口仔仍然認為呢個情況唔會“一直”維持落去，一來匯豐已經收緊按揭批核標準，二來早兩年已經開始為有關貸款開始撥備。最壞的情況係2008年及2009年首兩季仍然要大額撥備，但數字比2007年大幅增加的機會不大。大口仔反而樂見匯豐的生意不論於歐洲、亞洲及北美洲都越做越大。

紀勤為個人理財業務提出左三個優勢，分別為卓越理財品牌、環球信用卡平台及直接銀行服務，大口仔睇完都覺得大開眼界。

先講卓越理財，大口仔之前提過呢個品牌點樣幫匯豐股東賺錢，紀勤於年報中更加將之量化，提到一個卓越理財客戶可以為銀行賺2,000美元，現有210萬個卓越客戶，目標係四年內將客戶基礎提升至600萬個。如果如紀勤所願，四年後有600萬個卓越客戶，單係呢個客群就可以為匯豐賺到2,000 x 600萬 = 120億美金，約為2007年整個個人理財業務的一半收益。

信用卡方面，紀勤透露匯豐信用卡全球已經發行左1.2億張信用卡，已經落手將唔同的信用卡平台整合為一，節省成本及增加品牌效應。2007年匯豐信用卡收費收益有65億，比2006年的53.7億增加21%。係品牌效應影響下，匯豐信用卡的發行量於2008年應該仲可以繼續上升(特別於中國與交通銀行聯營的信用卡發行量上)。信用卡業務於2008年應該可以繼續看好。

最後紀勤提到直接銀行服務，呢方面香港人應該比較陌生，直接銀行服務為客戶提供別於分行的銀行服務，主要於網上提供一般銀行產品給客戶。因為唔需要維持分行成本，客戶使用直接銀行服務時一般可取得較多優惠 (如存款利率)。呢種服務模式較適合外國，匯豐亦已於美國、南韓、台灣及加拿大推出，反應應該唔錯。

總括黎講，匯豐個人理財業務於2007年其實發展得幾好，生意做大左，費用收益多左，但由於受到大額撥備162億所累，業績反而倒退左42%。

展望2008年，由於股市波動，大口仔預期匯豐交易收益、佣金收入相信無可避免地會倒退，但信用卡業務好大機會可以保持增長速度，利息收入因息差擴闊應可保持。坦白講，大口仔估計匯豐個人理財業務收益於2008年保持增長的機會只有一半左右。關鍵在於北美地區的撥備水平可否回落，若數字維持於162億或以上，那今年匯豐個人理財業務的業績應該會倒退了。