匯豐 (6)

工商貿易業務

匯豐工商貿易業務分貿易服務 (進口、出口貿易、貿易融資、應收賬貨款)、工商貸款 (資產融資、按揭、機器貸款)、投資及保險 (基金、一般保險、要員保險)、資金管理 (信用卡、匯款)等等。一個環球網絡平台令匯豐o係個人財務管理業務有絕對既競爭優勢，咁工商業務又如何呢？

答案同個人財務管理業務一樣，都係絕對優勢。試想像你經營緊一盤貿易生意，從中國買貨然後賣去歐洲同美國。如果你要選擇一間銀行幫你開出信用證到中國、從歐美收款或匯款到歐美，你會揀咩銀行呢？如果有得選擇，你當然會選擇一間國際知名、而且於上述三個地區都有較多經營點既銀行啦！匯豐似乎係一個幾好既選擇。

你會問，咁花旗、美國銀行唔好咩？無錯，論市值 (次按之前)，花旗同美國銀行比匯豐都要大，但市值大唔代表佢地可以貫通各地業務。其實花旗同美國銀行於國內分行網絡發展得唔算快、甚至落後於同業，於歐洲亦遠遠追唔上匯豐既發展規模。花旗同美國銀行早兩年市值大，主要得力於美國既發展，如果講環球網絡，仲係匯豐優勝得多。

於世界各地有經營點有乜好處呢？其實好處好多，例如匯款快，遇到問題當地o既職員可以提供適當協助，如果供應商同買家對於你所選用o既銀行有所認識，亦可以提高彼此o既信任。若果大家都係用匯豐銀行做主要往來銀行，交易起上黎就更加係又快又方便。如果你無做開生意，你就咁聽我講D好處會幾抽像，但如果你係生意人，你一定會明白固中理由。

銀行界工商業務圈內，對匯豐工商業務部真係又愛又恨。愛者，因為匯豐工商部一向好少用價錢去搶客人，同業間o既價格競爭唔算太激烈。恨者，匯豐o既客人一向出名忠心，同業間要競爭搶客，要從匯豐手中搶走一個客人真係難過登天。理由好簡單，客人如果用開匯豐o既貿易、銀行服務，佢地都幾難從新適應其他銀行相對落後既網上銀行、分行網絡同產品質素等等。如果係用開匯豐開支票、開信用證，但突然間停用或用第二間銀行，你o既供應商一定有意無意咁問你公司係咪出現左問題....

如果我地將匯豐個人理財業務同工商業務o既優勢結合，你會更加了解點解我會話呢個環球網絡平台對於匯豐黎講個咁值錢、你會了解點解咁多公司o既老闆都選用匯豐。如果你有間翻查香港上市公司o既主要往來銀行，你會發覺匯豐好多時都榜上有名。除此之外，唔知你有冇發覺好多大中小型公司都鍾意選用匯豐做出糧戶口呢？點解？因為好多時公司既老闆本身都用匯豐o既個人銀行服務、因為大部分打工仔都有一個匯豐個人戶口囉！用返匯豐做出糧戶口就可以省卻公司好多行政上既麻煩。

行內人都知，匯豐o既收費一定唔會最平、息口又唔會最優惠，而銀行同業亦樂於以匯豐為馬首是瞻 (你平我就平過你，唔係點搶你D客？)。其他銀行平過匯豐，點解多數客戶仍然以匯豐為第一選擇呢？點解客戶一邊話匯豐收費貴、分行又成日打蛇餅，又一邊鬧一邊繼續用匯豐呢？我諗上述提到既環球網絡平台、個人理財服務同工商業務o既結合優勢都發揮緊一個良性循環o既影響。

大口仔會話呢個係"匯豐溢價"！