金融海嘯下如何保住飯碗

金融海嘯下人人自危，之前一篇文問大家覺得自己對公司有幾重要，得出的結論係"呢個世界無話無左邊個唔得"....

啱丫！係無話無左邊個唔得，但要推人落海總有先後之分，鐵達尼沉船都總有生還者！避免自己成為第一、二波裁員目標係大家於金融海嘯中的首要任務。

點做？

好可惜，冰封三尺非一日之寒，如果你不幸成為公司的第一波下崗對象，你之前一定做落一些令上司睇唔過眼的事。未必一定係你問題，你可能好見義勇為地在"不適當的場合"以"不適當的方法"提出"絕對正確的意見"，你的意見雖然非常正確，但場合及方法錯了亦都可以置你於死地。

事後你仲以為自己好英明神武，老闆要多謝你都黎唔切，但Sorry！老闆並唔係咁諗....

由於第一波下崗對象多已反魂乏術，而且大口仔亦相信第一波的裁員潮已過，重點反而應放在第二波裁員潮上，個人估計高峰期將在農曆新年前後。如果大家聽得入耳，請盡量做到以下幾點：

1. 返工同食飯時間盡量遵守公司規則
2. 避免請過多病假(小小頭暈、肚痛就請一日假？)
3. 公司團體活動要盡量參加
4. 有機會參與公司各項計劃要盡量做，唔好怕蝕底，最好主動提出參與
5. 有關裁員的敏感話題，請不要主動與人討論，甚至不要參與
6. 在逆市中要表現出恰當的樂觀，不要因氣氛不好而放慢工作進度

上述係中短期措施，可以幫助大家在一班表現差不多的同事中保住飯碗，不過如果你之前有其他致命的死因出現過，咁真係神仙難夠，做足以上六點都無用....

下一篇講金融海嘯下的如果保障自己及家人的生活。