2008年1月20日星期日

匯豐(3)

美國業務問題 - 350億救SIV=血本無歸?

好多人關心匯控上年尾宣布為左拯救旗下兩家SIV公司,為佢地提供最高多達350億(美元,下同)的流動資金及定期融資會血本無歸。大口仔為大家分析呢個問題之前,大家就先要了解何謂SIV。SIV是花旗集團於80年代後期係倫敦最先創立的,佢地通過發行短期商業票據或中期債券獲得現金﹐然後用借返黎既現金用來購買高收益資產,包括銀行債及美國抵押貸款證券等等。 一般SIV以摃扞式運作,即用1蚊本借9蚊再買10蚊資產。如果所買既債券收益高於借貸成本(如1%),咁收益就會有約10%。好過去搶....

因為早兩年次按相關產品大行其道,為投資銀行同其他金融機構提供左看似回報高風險低既投資工具CDO (Collateralized Debt Obligation)。大銀行如花旗、美林同匯豐都透過成立SIV為佢地既企業銀行客戶管理同投資CDO。由於回報高,風險係美國房地產市道好既時候又相對低,所以呢個市場發展得非常快。

匯豐亦有參加呢個市場。佢管理兩個SIV公司,為其企業客戶管理多於650億既抵押投資工具。呢650億大部分係由市場以低息集資購入。本來相安無事,短期商業票據或中期債券市況良好的情況下SIV公司非常容易獲得資金去繼續其低借(錢)高息(收入)呢個遊戲。不過好景不常,去年年尾因次按問題令到信貸市場緊張,連帶短期商業票據或中期債券市場借錢非常困難,就算借到都好高息。SIV借既係短中期錢,到期還錢又借唔到新錢咁點算?唯有賣資產囉。

但因為舊年尾開始市場上對所有抵押債券產品都敬而遠之,即使高質素資產都無人想要。匯豐旗下兩間SIV都唔例外。咁點算呢?匯豐管理層深知短期商業票據或中期債券市場短期內唔會好轉,又唔想旗下SIV賤賣資產,於是想出一個方法 ─ 用自己既資金借俾呢兩間公司。

唔知大家知唔知,係銀行既角度,借錢出去俾人既錢叫ASSET(資產),客戶既存款叫LIABILITY(負債)。出面好多人誤會左匯豐用350億去買SIV450億資產,先要將SIV資產併入資產負債表。但我認為匯豐只係為SIV提供短期商業票據或中期債券去維持SIV運作,簡單講只係借錢俾SIV,而唔係買佢地既資產。當然,借錢俾人當然要有"渣拿",係乜?咪就係SIV既450億資產低押返俾匯豐囉!

你會話,車,咁咪一樣,但實情係好唔同。如果匯豐係買左SIV既資產,如果批資產因為市況問題價格繼續下跌,匯豐係要撥備的。雖則話350億去買450億有100億水位,但因為今年初市況實在太差,即使有100億水位仍然有可能要大幅撥備。不過如果只係借錢俾SIV又唔同,匯豐用350億LIABILITY(例如存款)去借350億ASSET(債權)俾SIV,即使SIV資產繼續下跌,匯豐只要相信SIV唔會有太大違約風險,佢地都無需為佢提供既350億貸款做任何撥備。咁你又會問,D資產係咁跌,SIV既股東會唔會唔還錢呀?答覆係有機會,但機會好微,因為匯豐旗下兩間SIV公司既股東都係大型金融機構,佢地唔還錢等如佢地破產先會。市況係壞,但出現金融機構倒閉既機會仲係好微,英國NORTHERN ROCK都有英國政府救啦,好難死得去。

結論係,匯豐呢350億借左俾一班因為市況不明唔想賤賣資產既有錢佬。要匯豐蝕哂呢350億就要呢班有錢佬破哂產,同埋佢地所持有既抵押品都無哂價值先會,而匯豐借俾佢地既錢仲要有息收架!血本無歸?你話呢?

9 則留言:

畢基 說...

Thank you for your sharing. Your explainantion of SIV problem of HSBC is plain and easy to understand.

Please take time to express your views on HSBC's medium/long-term development.

Keep up the good work.

肥魚爸爸 說...

我相信匯丰是借錢給這兩個SIV,唯一弄不清楚是若這350億是以loan and advance to customer入帳,這350億應在risk averaged asset反映。若這理解正確,那麽匯丰是有可能集資維持TIER 1 capital ratio。但觀乎通告公佈了那麽久匯丰仍沒有任何行動,或者這350億真是如匯丰所形容,非常優質。

大口仔 說...

TO 肥魚爸爸

匯豐於2007年中期業績宣佈一級資本有973.44億(美元,下同),風險加權資產有10,415.4億美元。假設將350億納入資產負債表,風險加權資產增加至10,765.4億,一級資本比率由9.3%減至9.04%。假設2007年下半年賺60億又派息60億,一級資本比率會維持於9%以上,高於美國7.5%及香港8%監管要求。

大口仔 說...

TO 畢基

THANKS. 有關匯豐中長期投資價值分析,會分析完匯豐主要業務競爭優勢後先寫。歡迎賜教。

肥魚爸爸 說...

謝謝指教,令我對匯丰的一知半解得以改善:)

匿名 說...

"Big Mouth" Sir,

1. What if that USD350 billions loaned to the two SIVs (i.e. Cullinan and Asscher) have become totally impaired, how would it affect HSBC's account in particular its Tier 1 Capital Ratio and where can all these changes be registered from the auditor's point of view?

2. Other than Cullinan and Asscher, HSBC's 2007 half year report has also disclosed there are five other SIVs. Are they also about CDO? If not, what are they?

Thanks a lot.

大口仔 說...

TO 無名氏

如果匯豐呢350億貸款既借款人無力還債,貸款將要註銷,即係蝕左,要入P&L,第一級資本會唔見左350億。匯豐現有第一級資本係970億左右,理論上唔見左呢350億好大獲。但我亦要清楚指出,呢350億貸款係有抵押既,係匯豐宣佈注資時既公平價值係450億,另外,SIV公司既擁有人都係大中型金融機構,同時違約風險微乎其微。

你第二條問題我答唔到你,因為我再翻閱2007年中期業績都搵唔到你所指其他五間SIV,可唔可以話我知係第幾頁?我睇完再同你傾....

匿名 說...

I apologise for my mistakes made under my Question 2 dated 28 Jan 2008 11:34AM. Question 2 should be as follows. Other than Cullinan and Asscher, HSBC has also disclosed four other conduits, namely Solitaire, Bryant Park, Regency and Abington Square, under the heading of Conduits and SIVs on page 9 of its pre-close trading update dated 14 Nov 2007. I wonder if they are also subprime/CDO related?

Thanks a lot.

大口仔 說...

TO 無名氏:好問題!但唔想早率回應你既提問。資料我已經睇完,亦有自己既答案,我會另開一篇文分析呢個問題。請留意....

或者有機會你都講下你自己既睇法,互相切磋。

Related Posts with Thumbnails