一百萬人的故事

本來唔想講，因為講出黎一定會有人覺得大口仔冷血或不近人情，但噚晚睇完"一百萬人的故事 - 全民開講"，實在有D不吐不快的感覺。

根本成個節目似聲討大會多過討論會，主持人不斷煽動在場人士將生活中的不如意事大講特講，跟住又問好多引導性問題，根本不似大學教授所為。

你問一大班因為種種原因月入不過HKD5,000的人立法實行最低工資好唔好？梗好啦！有著數喎！最好最低工資定於HKD24,000.....

人窮並不可怕，最可怕係當事人不明白自己貧窮原因....

大口仔細個屋企環境都唔好，但親眼睇住老豆老媽子如何憑一雙手，白手興家建立左一個相對良好的環境俾大口仔成長。我亦由細開始不斷提醒自己，要努力將呢個環璄進一步改善。經過兩代人努力，終於都脫離左所謂貧窮o既行列。

o係香港，就算窮人都一樣有機會接受良好教育、讀大學....只要你肯努力、有良好的理財觀，要脫貧比起世界上好多國家都容易。

大口仔老婆亦有感而發(佢係band 3中學教師)，佢見到好多學生平時上堂只係識訓覺、學習態度係零，將來除左做$16一個鐘的M記或者保安清潔，都好難搵到其他工....

好多時貧窮係"果"，人的心態及行為先至係"因".....

你今日要求就最低工資立法，有冇諗過聽日連$4,000一份清潔都會無埋，或者商人用$8,000請一個"年青人"做兩個"相對老年"人士的工作？試問問題有冇解決過？