金融業的混業經營

非常高級的Albert兄昨晚談到平保的混業經營模式，閱畢大口仔想多嘴補多一兩句....

何謂金融混業經營？大口仔假設意思係指金融集團旗下有數間子公司經營不同o既金融業務，當中可以包括銀行、保險、基金、強積金服務等等。基本上我覺得同"管理錢"有關的生意都可以屬於金融業混業經營o既目標範疇。

作為銀行人，大口仔深深感受到金融業混業經營的龐大商機，亦相信大部份金融產品的互通性非常高。舉個例子，如果你o既出糧戶口係某銀行，你會唔會想自己o既強積金戶口同時o係o個間銀行呢？仲有信用卡呢？又如果自己份人壽保險又o係o個間銀行供，出完糧一站式找信用卡數，供埋保單，唔駛d錢成日轉黎轉去咁煩喎，都真係幾方便！係咪？

如果大口仔再話你聽，若果你份人壽保險同強積金o係o個間銀行，你問銀行做按揭時可以申請到比其他人平半厘貸借利息，借錢交稅可以借做6個月又平息，會唔會更加吸引到你集中哂所有有關"管理錢"的產品去同一間"銀行"？又如果你自己係老闆，又可以憑藉自己o係個人銀行o既產品記錄無低押咁申請到貿易信貸額，仲有平息，你又點睇？

上述係幾個簡單例子，具體去講金融產品的戶通性，當中o既可能性可以係無限大的，只要有人諗得到，金融機構有心有力地去實行就可以推行。當然，當中涉及好多科技上、政治上(金融機構內部的)同法規上的限制，唔係一時三刻可以解決，甚至根本解決唔到。但大口仔相信金融業要做大做強、要拋離同業，混業經營絕對係一個可行的方向。

混業經營要成功，關鍵在於金融機構如果有效運用自己的客戶基礎、網絡同品牌優勢。要數現今最成功的金融混業經營者，大口仔相信自己的愛股匯豐 (其實應該叫匯豐金融控股，不過大口仔有情意結，見諒)一定榜上有名。之前寫過匯豐如何利用本身的分行優勢同客戶基礎去拓展保險業(見另文匯豐 (7) )，呢個例子就正正係金融業發揮混業經營優勢的真實例子。記住，匯豐在香港的保險業係由零開始的，到今日如果匯豐將旗下保險公司分柝出去，你估價幾多錢？

大口仔唔敢話匯豐的混業經營最終一定會前無古人地成功，但至少佢已經證明左，如果金融機構能夠衝破科技上、政治上同法制上的障礙，之後所發揮到的威力係可以好驚人的。

市場上似乎有唔少投資者質疑平安保險提倡的金融混業經營模式，認為此舉不可行，是搵命搏行為。但有冇人留意到平保為其混業經營模式做左大量工夫，包括引入匯豐做策略性股東，收購富通及富通投資等等。如果投資者單純地將平保收購富通當作一項普通投資，咁未免太睇少平保管理層喇！

大口仔大膽講句，今日大陸金融相關市場仍然百廢待興，退休產品、財富管理產品同銀行相關產品都有著龐大商機。但因為分行網絡同法律o既限制，外資要爭奪呢幾個市場根本唔可能，只有各內地金融機構可以去競爭。如果o係開始階段唔努力去建立自已的品牌、去收購相關的配套，只係靠國家"私人醒"的投資機會去增長，呢種增長會持久嗎？

"平安"兩個字會唔會係將來中國版的"HSBC"，大口仔會密切留意，伺機增持....