匯控大跌

匯控在過去兩天大跌，平均每天跌4-6%，一來一回本來今年跑贏大市的幅度消耗殆盡，看短期走勢可能仲有得跌....

網友問大口仔點解？坦白講我早兩天發覺匯控在英美走勢大幅跑輸大市已開始思索原因，昨天匯控在美國ADR大跌10%，俾大口仔感覺有點似曾相識，似乜？似渣打11月宣佈供股前的走勢，又係日日大跌6-8%直至宣佈供股為止。

此外，匯控大跌的時間亦正直聯儲局宣布大幅減息至零(週三)，眾所周知匯控坐擁大量存款，存款的投放主要為客戶貸款、同業拆借、買入國債、公司債等投資工具。隨住聯儲局大幅減息，有機會令市場的LIBOR及美國長債利息大跌。匯控的投資取態比較保守，有一大部分的資產以美國國債及同業拆借的方式投放，如果美國國債的息口減致接近零及LIBOR繼續下跌，即使匯控的存款同樣唔需要俾利息，匯控財資部的利息收入都會大幅縮水。

其他老掉牙的負面因素包括英美資產質素轉差、新興市場經營環境變壞、馬多夫騙案的相關損失及股息有機會減半等等大口仔反而覺得未必係今次大跌主因。

大口仔不喜隱惡揚善，早前對匯控營運表現的推測只中一半，11月之後的局勢發展完全超出大口仔早前的估計。錯了就要認，同時要檢討箇中得失及長線投資策略。個人相信匯控可能好快會公佈增強資本方案，至於係供股定配股，大口仔無水晶球當然唔會知，但相信在現市況下能夠增加資本係好事，而且越快越好。