2009年1月30日星期五

富國銀行(Wells Fargo)的全年及第四季業績 (1)

"富國上季勁蝕200億"是星島日報有關富國銀行業績報導的標題,文中說富國因為第四季接收了美聯銀行後,出現八年來首個季度虧損。

大佬呀!人家在公告中明明白白說了因為收購美聯是2008年12月31日的事,今次富國的損益表並不反映美聯盤數,只在綜合資產負債表中反映兩行合併後的資產。記者大哥你咁樣"老屈"前美聯銀行好似唔係好妥當喎!

言歸正轉,同上次花旗及美國銀行一樣,大口仔為大家總括富國第四季業績,希望可以為匯豐第四季業績帶來一點啟示。

富國銀行2008年全年及第四季業績的重點如下:

1. 全年營業額上升7%,達422.3億(美元,下同)。
2. 全年賺28.4億,當中包括81.4億新增撥備及16.8億一次性開支。
3. 稅項及撥備前盈利增長18%,息差擴闊11點子,達4.9%,於同業中屬最高水平。
4. 第四季蝕25.5億,但當中包括撥備56億,當中39億屬按保守標準新增的撥備儲備。
5. 富國加美聯的撥備準備達217億,壞賬覆蓋比率達"320%"!
6. 平均貸款總額上升11%,管理層強調富國仍然是"Open for Business",仲做到生意係因為2005同2006年的保守策略所至,好熟?係,因為同匯豐英國的情況一樣。
7. 平均存款增長了31% (不包括美聯數字)!平所有美國銀行都仲要好,存款佔有率升至全美第二!!
8. 利息收入因息差擴闊及貸款額上升而增加了12.4億,比新增的撥備還要多。
9. 第一級資本比率為7.9%,下跌230點子,但此為數字遊戲,錢由第一級資本轉了去撥備準備。
10. 無打算要額外注資加維持去年派息水平,第四季每股派$0.34。

睇完,閣下有乜感想?

大口仔的感想下篇再續....

6 則留言:

肥魚爸爸 說...

又是我匯丰好友,看完數據,我覺得匯丰整體業績應不會太差(又是有一點一廂情願的想法),哈哈:p

GapLo 說...

就這些數字看,富國的業績其實不錯,早前大跌我覺得是非理性。

若缺齋老人/陳潢 說...

將就下啦!新左報係咁既水準!

我出沒附近有免費新左報,通常一到手即刻將疊金融版掟入回收桶減輕重量,份新聞版一個早餐時間已經睇晒!

(回想當年在培僑時朝朝早睇既文匯絕唔會咁既水準,人做左報佢做左報點解質素差咁遠?)

匿名 說...

邊份係 "免費新左報" 呢?
大口仔又賣關子 =.=
(你個感想唔會係關於份報紙呱 =.=)

若缺齋老人/陳潢 說...

匿兄:新左報 = 星島,起個咁既標題無論對金融的理解定文字都唔合格;

免費係因為我出入的地方有得拿,早餐時唔想用腦,掃新聞就最岩。

大口仔 說...

肥魚爸爸:花旗、美銀同富國的業績對匯豐第四季業績有啟示,大口仔遲些日子再講。

GapLo:富國的基本業績強勁!

若缺齋老人/陳潢:因為寫o個個好可能係剛畢業的大學生,平時又無乜留意財經新聞。

匿名:係對富國業績的感想,不是賣關子啊,係寫唔切。

Related Posts with Thumbnails