2010年5月9日星期日

訓街? (3)

明白到政治議題總是沒完沒了,大口仔沒有意圖要全世界的人被自己說服,我只是嘗試以自己的方式,勇敢清晰地表達自己對香港樓市的意見,這篇應該是大口仔最後一次評論及回覆有題香港樓市議題的文章。

昨天的文章出街後,喜見不少志同道合的朋友也來分享個別的親身經歷,當中所帶出的正面訊息是香港近年所缺乏的,希望咱們都可以一起繼續努力。

留言越夜越刺激,"白痴"、"屎"、"尿"都出齊了,不打緊,這些比起很多網上留言已見克制,算是對大口仔的半點尊重吧?但我想強調的是,閣下在人家地方"大小二便"前說聲"對不起,我要隨地拉了!",主人家還是不願見到閣下隨便在自己的地方拉屎拉尿,所以下次要拉便拉,不用剎有介事地先說對不起了。

看了各位的留言,大口仔反覆重讀自己的文章,我問自己有沒有將過去的一套強加諸全世界的人?答案應該是沒有,那個所謂邏輯問題,我實在找不到前文的任何內容能令讀者聯想到這種"我以前點辛苦先買到樓,所以你要跟我條路"的一字一句。

事實我亦不曾這樣想,在自由市場,閣下有本事的當然不用辛苦就可以置業,沒有人對任何人能夠輕鬆置業有任何意見,包括我自己。能輕鬆置業的方法亦有好多,包括在市況低迷而非瘋狂時入市、提升自己的收入或選擇門檻低一點的物業進場。但問題是為何持有物業的業主要平賣給你?業主只會在經濟環境不好、利息週期上升、供應增加但需求減少的情況下才會降低價錢求售吧?若明白,便大可自己爭取置業的機會了。

我在前文分享了自己的親身經歷,反覆強調香港樓市在過去多年都是有升有跌的,市民不用急於在市場瘋狂的時候入市,起居屋的要求多數在市旺時提出,到政府起好後賣給市民時,由於居屋是以市場的七折價賣出,所以售出的價錢又是相對高,市民買入後又不能租出,要賣就要補地價才能成事,變成居屋的流動性極低,在市差時持有居屋的市民會更容易"賴野",這先對有份買居屋的市民不公平。若果不限制租售或以更廉價的售價出售居屋又如何呢?那其他沒有購買居屋的市民利益又應放在何處?這後對其他市民不公道。

最後,大口仔想借讀者提供的,一位工作了六年的老師作為例子,指出市民可以如何置業。一位工作了6年的老師,6年前人工應該由18,000起步,由於有增薪點人工會每年增加,現在應該升至約26,000-28,000吧?

大口仔以Yoho Town這個指標屋宛為例子,Yoho Town樓齡7年、新鴻基樓、有基本會所設施、位置離元朗西站10分鐘腳程、旁邊為即將開幕的新鴻基大型商場,她的兩房單位(約525至544呎)在2009年中的價錢約180-200萬,現時則約為200-230萬,視乎不同樓層及座向而定。如果我假設那老師在工作了6年後能夠儲蓄到30萬,即每年約5萬(每月約$4,000),應該不過份吧?若那老師在去年中借85-90%按揭,俾18-20萬首期買入上述的兩房單位,當年息2.5%,分30年供月供約$7,200一個月,供樓佔收入比率約26%,那他是否買不起樓呢?他是買不起美輪美奐的新樓,所謂假豪宅,還是買不起樓齡還算新的二手私人物業?

當然,不同人有不同取態,有些人可能話元朗樓點住得人(第一城又如何)?有些可能話借90%按揭好危險,一定要借70%,因為金管局都係咁俾指引,有些可能又話咁貴買元朗樓遲下跌點算?係囉,其實講到尾置業都係一種投資,投資就有風險,差在你將那風險以居屋或私樓形式體現,你如何看樓市未來的走向發展?

除了有關某少部分80後成世搵$9,000的言論我聽得不舒服,我更不舒服的是聽到成日有人話住新界就好慘。

喂,你知唔知全香港有幾多住在新界那些所謂點住人的私樓安居樂業?你知唔知政府投放了多少香港納稅人的錢去興建交通網?你知唔知沙田、元朗、大埔出尖東只分別需要約20、24、28分鐘?隨時快過你柴灣去中環及尖沙咀?大口仔住開新界反而唔願意搬去市區,因為新界空氣較好、休憩地方較多、樓價相對比市區又平得多,其實住新界有乜唔好?

75 則留言:

熱鬥小英 說...

實在寫得好! 你所講的都係"現實"! 有d人假設左樓價只會一路升, 驚而家上唔到車, 就以後都上唔到車, 所以心急到有少少失去理智. 如果銀行不停放水都上唔到車, 而家俾你買到層樓, 加息後可能仲大件事呢! 儲多d錢始終都係上策.

匿名 說...

"大口仔住開新界反而唔願意搬去市區,因為新界空氣較好、休憩地方較多、樓價相對比市區又平得多,其實住新界有乜唔好?" X 10000

匿名 說...

寫得好!問題是正面訊息在香港傳播媒介已少看, 這實在令人擔心.

匿名 說...

香港的年輕人似乎變得沒有適應力, 除了市區已不能生活, 新界已太遠, 怎樣能在全球化的環境競爭?

匿名 說...

Hi, 12:22

Maybe they are right. If they are not ready to take up the challenges, they may eventually "成世人都係搵$9,000".

匿名 說...

" 住開新界反而唔願意搬去市區,因為新界空氣較好、休憩地方較多、樓價相對比市區又平得多,其實住新界有乜唔好?"


Agree! Agree! Agree!

柒加伍 說...

香港的問題是:傳媒、政黨和教育。
傳媒不再持平報導,只為挑動社會矛盾。
政黨不再有理想,只想出位,以保慨得權位利益,議員變成看住已經霸得的地盤,見到任何事物,都不問情由,不理道理,亂吠一通。
教育(包括學校和家庭)不再教導獨立思考,明辨事理和做人道理。
結果:人人所愛講的大道理,都是自己一定有理有權,當然無義務啦,別人欠我嘅!
香港人的心態,明顯是我唔要共產黨,但我要共人地的產。唔係咩?政府要俾我有工返,有屋住,買得起樓,人工有保障,...... 唔係共產黨,邊有咁平等!

匿名 說...

GOOD AND SUPPORT!

Samuel

匿名 說...

Agree with 柒加伍

knucle 說...

其實點解住屋咁基本o既需求,要搞到用投資心態去做呢? 係咪有咩地方搞錯左?

買冬天衫係咪又要等到春天時清貨大減價先買,然後冬天時就租黎著?

可唔可以政府自己起屋黎製造一個低收入階層o既市場,而呢d樓淨係o係低收入階層之間自由流通?

KT 說...

大口兄, 我十分同意你的說法...

人總得付出努力才會得到成果, 還是把精力放在適當的地方吧...而且要獨立思考, 少被那些政黨喧染....

只一兩個例子便說明了何謂買不起樓....莫非政府不單要起居屋, 並要將收入門檻升至上個人$20,000一個月或更高, 而且起於臨海地段, 而且首期不用付?

匿名 說...

哈哈, 感謝有班不思進取的80後, 為大眾業主供樓, 買樓的風險就由業主去承擔吧,一眾"租奴"繼續零風險安穩地過生活好了, 這是什麼? 這是現實!

聖天 說...

大口仔分享左買樓既經歷
我都分享一下我既買樓經歷
在下中五畢業,為左儲錢,早一份晚一份。
日頭做正職司機,夜晚做外賣司機...
加埋搵萬5一個月...
自己洗6千,一個月儲9千...
再加埋合理投資,絕不投機...
最後儲起左60幾萬...
又話說上年匯豐跌到48元,我老媽子買左20萬匯豐,跌到38元又買,然後再供埋股...
三個月後,升到72元賣晒,拎返60萬出黎...
我同我老媽子加埋有120萬...
但我同我老媽子只係拎左50萬出黎買一層九龍城價值150萬既低層有LIFE屋苑...450呎...月供5100蚊,平過我自己租樓住,開心到笑。

我呢個中五畢業既人,靠住勤力(好多勤力)同運氣(小小運氣),都買到樓...我唔明點解D人會話好難買樓...

唔肯儲錢,唔識理財,懶,依賴心重...
以上係我認為買唔起樓既因素...

如果唔貪心,唔一定要住大屋苑,市區好多400幾尺既樓,200萬樓下係有的...
上年我既買入價150萬,2樓,30年樓齡,市區。 只係外觀冇咁靚啫,但要上車,我相信勤力一定得。今年我層樓都只係175萬左右...都仲係200萬樓下既市區樓...

合十

匿名 說...

政府起屋是有機會及衍生成本, 包括對稅收的影響, 人人要求政府要俾我有工返,有屋住,工有保障, 再發展下去,香港只有加稅及借錢, 強迫下一代還

匿名 說...

政府自己起屋黎製造一個低收入階層o既市場,而呢d樓淨係o係低收入階層之間自由流通? --- 但是收入門檻不會高過個人一個月$10,000 (低收入階層!!), 並且不可能在優質區域.

匿名 說...

To Knucle

居住需要與置業投資是不一樣的事情

Skywalker 說...

香港有四大家族, 他們很叻, 政府賣地話明祇可要起十萬呎樓面, 他們卻有本事在投到地後可以扭多三萬呎, 他們擁有龐大的資源可以聘請法律專業人士和退休政府官員, 擅長扭政府計以謀取更多的利益, 加上他們在行政會議和立法會有代理人, 對政府施政有很大影響力。大家以為代表飲食界張宇人是飲食界的老闆嗎? 不! 他是郭氏家族旗下私人會所做一個總經理, 報稱幾佰萬年薪, 好過自己做老闆, 復建居屋對那些人最不利?

太多人給人剝削和玩弄而認為理所當然的!

匿名 說...

如果問題在市場結構, 那便想方法增加競爭, 加強監控, 而不是任何具補貼成分的政策

vemma日比野 說...

你好~想與你分享

這份即將在中文市場正在爆炸的網路創業自動跟進系統,

如果你對網路居家創業有興趣,歡迎免費註冊試用系統90天的威力

輸入你的會員帳號及密碼登入你的網站後, 可閱讀更詳細內容。

當你在學習如何上手這份網路事業中,並常常安置新會員給你!

給與鼓勵,添加你的信心!

團隊互助共同建 立一個有健康有財富自 由的夢想生活


抓住機會!!
為自己與所愛的家人 也幫助他人



歡迎大家踴躍免費註冊90天體驗(評估和瞭解)
覺得不錯在加入=> http://vemmaboss.weebly.com




也適合媽咪在家工作,又可兼顧小孩
家庭與事業能兼顧的工作何樂不為?

請用即時通email 註冊佳
加你好友,線上傳送更多資料給你參考
還能一起討論喔~

匿名 說...

無啦啦,做咩有人賣廣告?
救命呀,上面果位vemma老哥,
可唔可以俾下面,
讓我們謝絕一切留言式廣告呢?

KT 說...

回kuncle,你的比喻是否有點誤道?!

衣服是必須品,住屋是必須品,但屋本身都非必須品,這點很重要…

我是否可以說:
"其實點解食咁基本o既需求,要搞到用投資心態去做呢?係咪有咩地方搞錯左?

食lunch係咪又要等到下午茶大時段先食,晚餐無得平就挨住餓先啦?

可唔可以政府自己開D茶餐廳送俾收入階層去營運,而呢d茶餐廳淨係o係低收入階層之間自由流通?

匿名 說...

Skywalker: "太多人給人剝削和玩弄而認為理所當然的!"

旨哉斯言! 很多香港人付出高昂的代價置業, 他們有沒有想過: 其實, 他們是不必亦不應捱得如此艱辛的. 不必讀過多少年經濟學, 只要頭腦清醒, 都應瞭解到一個基本事實: 數大地產商已然壟斷香港的樓宇市場, 政府袖手旁觀或官商勾結(視乎閣下的判斷), 任令他們操控樓宇供應及支配價格, 令香港人不論供樓或租樓, 均要付出沈重的代價. 這是絕對不公平、不合理的.

本人明白, 當你含辛茹苦經過不懈奮鬥終於成為業主, 而樓價卻因復建居屋而增加了下跌的元素, 你很難會感到安樂; 眼巴巴看著別人可以用較低的代價成為居屋或私樓業主, 如果感到心有不甘, 亦完全可以理解. 不過, 請勿試圖用歪理反對復建居屋.

有人認為面對壟斷市場, 解決的方法應是增加競爭, 加強監控, 而非復建居屋. 本人要指出, 這是脫離現實的空想, 除非, 所謂增加競爭是指政府興建夾居及/或居屋; 地產市場絕對不是一般商人可輕易大規模地進入的市場, 而加強監控只是表面造作, 完全觸不到關鍵的壟斷問題.

匿名 說...

"買冬天衫係咪又要等到春天時清貨大減價先買"-- 是的,我常常如此. 但是沒有投訴.有得買已經好高興.

匿名 說...

如以興建興建夾居及/或居屋來增加競爭, 夾居及/或居屋的價格必須高過市場地價及建築費用, 不能有任何具補貼成分, 否則便是不公正競爭.

匿名 說...

我什麼都不用說 !

大口仔, 我支持你 !!

匿名 說...

"如以興建興建夾居及/或居屋來增加競爭, 夾居及/或居屋的價格必須高過市場地價及建築費用, 不能有任何具補貼成分, 否則便是不公正競爭."

不論這是否公平競爭, 不如此就不可能破解或減輕住宅市場的壟斷情況, 置業者及租屋者就會繼續受到嚴重的, 甚至越來越嚴重的, 剝削.

匿名 說...

補貼是納稅人付的.納稅人不一定想如此用

匿名 說...

補貼來破解或減輕住宅市場的壟斷情況, 所有納稅人支付, 一部分人得益, 真的公義公平

Skywalker 說...

我是60後, 我住公屋出身, 現住私樓, 從未住過居屋, 但我有親友住居屋, 居屋使我那些親人不用做樓奴, 過著相對安定而不富裕的生活, 這是有居屋的好處, 我不是為那些想住半山的80後而說話, 我是為整體社會發展而著眼的。

我情願補貼市民而不願補貼超級地產商。

匿名 說...

如以興建興建夾居及/或居屋來增加競爭, 夾居及/或居屋的價格不高過市場地價及建築費用, 長遠必影響賣地收入, 影響稅收, 影響其他福利支出, 或者加稅. 這是無法避免的

世上沒有免費的午餐, 沒有人情願補貼超級地產商。但是否補貼市民買樓是一個選擇

沒有補貼地興建興建夾居及/或居屋來增加競爭(價格過市場地價及建築費用), 我是贊同.

匿名 說...

好同意Skywalker的講法

我是一個80 後, 好好彩家中有個錢, 可以幫到我買樓(不用供), 亦都因為咁聚到我最愛的女人( 你可以話我太太現實, 但我都覺得這樣才給到女人要的安全感) , 生活不算富裕, 但亦因為間樓自己的,所以唔怕成日給人加租, 有一些閒錢同太太去下旅行, 騎下馬,生活到挺開心

但眼見以前在我大學識的朋友( 能幹過我的有不少) , 今日為買樓死慳, 有些供樓供到唉... 老實講, 我唔太明白, 為何大家的人生因為我有一個富少少的爸爸, 所以一生可以做的事可以唔同 , 我SELFISH 個面都希望樓價PLS 日日升,但我良心個面都希望香港可以成為一個公平少少的社會, 不會因為一個富少少的爸爸就可以令一切相差咁遠

匿名 說...

民智未開即係未開。
大口仔呢幾篇文章,是客觀分析+個人分享之作,本人甚為欣賞。
然則,依然有網友發聲反對,堅持政府要做更多野,到政府苛責,對政府官員無禮無情的"DER"罵......
80後大學畢業生,畢業後第一件事不是去勞力工作回饋社會以回報政府投放了大量教育開支在他們身上(9年免費教育),而是第一件事想搵番間靚屋去娶番個靚老婆同去享受下生活,提高下生活質素...實在太自私了。
最慘,係佢地話佢地只不過是在活用人權,去爭取自己想要的東西,大聲疾苦他們如此有朝氣,而不是有怨氣...
真係頂佢個肺。
我都係大學畢業,畢業後好想多謝番個社會,同阿媽阿爸對我既養育之恩,結婚生仔進修...放在後位。因為我咁諗:無左政府同老豆老母,我應該一早就死左。。。
80後大學畢業生(無錢買樓個批),聽到同睇到你地既.....
如果我係你老豆老母,真係好後悔生左你出嚟。
而我,做左納稅人19年,真係好想同政府講,
叫個批80後大學畢業生無錢買樓而又恨上樓恨到發窮惡既自私怪,叫佢地嘔番晒政府多年投放在他們身上的教育支出,然後逐佢地出竟,
佢地自私到爆晒燈,呢個社會真係唔希罕呢班自私攞福利當人權既摩登伸手怪。佢地係一班好惡好冷有學識,好識歎世界既新潮乞衣。
好想用水炮謝佢地去宇宙算鬼數。
反正佢地咁自私,少左佢地呢班自私乞衣怪,香港肯定明天會更好。
大口仔,你是我欣賞的奮青,好彩香港有你。

Michael 說...

正所謂大話怕計數﹐大口仔不妨分享多幾個這些有數字的例子﹐恐防那些「為爭取而爭取的反對派」或「為支持而支持的議員」無用心去計過﹐或根本唔識計這條數。

匿名 說...

很認同大口仔講法. 好欣賞閣下. 我都想分享一點.
本人係70後, 起步亦是不容易. 中五畢業無經驗, 見好多份工先搵到$6,000蚊合約工, 叫自己做住先囉, 只怪自己無學歷, 又要養父母. 呢十二年一直做一直進修一直等機會, 薪水好自然慢慢提高.
幾年前結婚慳慳地唔敢問家人出錢, 而且只係租樓住, 仲要係好多人唔想入去既天水圍, 夜晚放學仲要坐長途車返"悲情城市". 有頭髮邊個想做辣里, 邊個叫我地兩邊家底窮, 好彩我老婆都唔係貪慕墟榮既人, 兩公婆死慳死抵儲幾年錢, 呢幾年一直比人笑"租奴", 住悲情城市. 咁又點, 唔住得咩? 我知係遠, 只係暫時姐, 我有生育同置業目標. 忍耐下, 又何仿?
小女前年出世, 置業需求更大. 咁多年死慳死抵既積儲終於夠做首期, 計過供平過租先去馬買層"唔住得人"既新界樓.
唔該80後比 D 骨氣, 比 D 努力, 比 D 耐性, 唔好下下依賴人. 機會唔係人比, 係要自己爭取, 金融海嘯點解唔買? 要明白買樓係投資遊戲, 暫時買唔到就鬧政府, 樓價趺又鬧政府. 呢個世界無欠你架, 只有你欠世界.

匿名 說...

有網友反對政府偏袒地產商。
朋友,請問你:
政府既收入,你知唔知有幾多係來自那班富貴既地產商?????
可以話你知,好多好多好多同好多。
你試諗下,你走去廢除左個地產商,
呢個香港會面對什麼市場上既連鎖反應?????
我就真係不敢想像。

政府好多好多好多收入來源都係來自呢班達官貴人,呢班達官貴人輸送左好多利得稅同提供左好多好多好多就業機會俾香港打工仔。

我絕對支持政府慎重考慮,廣泛諮詢,
再去修定或落實或推行更好更有效既政策。

政府,
唔好輕舉妄動住,唔好俾班窮鬼而又大貪既刁民同刁難議員嚇親。

政府,
沉住氣,不要被刁民的怨氣聲打亂你地既工作。

我作為香港人,
我選擇去支持政府同信任政府。

刁民們,凡事必反??????
好難成就大事,你地心裡太多貪念同怨聲,
說話內容極欠建設性,
你地再咁落去,香港遲早俾你地班刁民玩謝,嚇走晒D大財團,地產商及城哥如果第一個拉隊走人離開香港,D樓留番比政府自己起,以後都無晒又地產商興建既私人樓。

沒有地產商,政府插手起樓,
成功同地產商行業爭取唔少地盤。
沒有地產商的日子,
你估香港到時會變成點???????
提下你,靠地產商開飯既地產經紀人數數以萬計,沒有地產商或地產商部份生意被政府老笠左,你估呢班地產經紀.....?????

匿名 說...

一個投資人路過

做左四十幾年人, 見盡牛熊, 香港由實火轉到現在的虛火, 外強中乾, 我只能說句時也命也

自己都曾是個二十出頭,年輕時有些行差踏錯, 書只讀到中二, 出到去才明白書到用時方恨少

自問若要成家立室, 錢財匱缺,但心中置家心切, 機玄之間投身股海,運氣使然, 賺了一生想不到的財富,之後投身樓房, 更是賺得不亦樂乎, 現在自問能安身立命

當時以我愚見,社會雖未及現在富裕, 但亦見較現在公平許多,機會更多
港英政府作為一個殖民政府,理論上只要苛求利益即可,卻為人民提供教育和居住
或許港英政府可愛之處就在這裏, 從來沒有說過要我們怎樣回報, 當時社會的聲音亦未見要什麼當時大學生怎樣回報社會, 只要他們為自己的利益打拼就可以了, 社會的發展又到前所未有的繁榮,我沒有讀過大學的經濟論, 但在閒時讀過<< Wealth of Nation>> , 才明白了經濟的皮毛

太陽底下沒新事, 所謂80後一直都有, 我只想大家明白, 口號永遠都有, 當年的為人民服務為中國帶來了什麼? 我不希望大家以什麼回饋社會的說話去堵住年青人的口, 你不會24 時做義工, 也不會把你賺到的所有錢分給有需要的人, 你只有賺你工作應給予你的錢,我賺了錢亦不會分姶人, 真正的回饋社會是由你在不支薪下工作, 請別說得太官冕堂皇, 利益和幸福到最後是個人

我只認為一個能夠讓年青人安身立命的社會,才能為社會帶來更大的繁榮, 復建居屋暫時在我看來才是一個解決的方法

Welcome for discussion

匿名 說...

說到回報社會,人人各施其法,只要停止伸手,已經係一個最基本的動作了,做唔做義工,不是重點,重點係,唔好做社會的蛀米大蟲,唔好要社會再花錢係你身上。
可能,做好自己分工,
做個良好守法既市民,
唔好吸煙,慳下電,慳下水,
都可能係回報社會既動作...
甚至愛惜自己,唔自殺,
唔殺人,唔打劫,唔放火,
唔強姦...都可以係一種回報社會既另類方法。
點解咁講,你乖乖地守法,
香港天下太平,
又可節省好多人力物力,警察肯定第一時間多謝你,起碼佢地既工作壓力會減少好多,
行BEAT當行街...輕鬆好多...
你唔好做賊,個社會可以慳番好多錢去捉你告你同唔洗嘥錢去請你食皇家飯....
唔做賊,已經可以是一種回報社會的另類方法。
不知你可會明白及同意?????
與你分享至此。
祝生活愉快,安康幸福!

匿名 說...

多謝大口仔的分享, 本人十分認同.
其實隨著香港經濟轉變, 80後的機會的確比以前少, 加上政客(最衰)及傳媒的影響, 思想更為偏激及悲觀.
我地應該鼓勵吓佢地,希望佢地更積極面對困境

匿名 說...

我想這個社會竟可到如此反智, 為沒做什麼而讚, 我想我沒做核彈和做Terrorist, 我想我們大概可以拿好市民奬

匿名 說...

我覺得依家有D似94-97年咁
好多人見樓價升心急買, 但唔覺得唔抵(其實係有錢), 要政府出招打壓, 打壓無效一窩蜂搶單位, 10厘息加二按大把人在.
之後點...樓市泡沫真係爆左, 但係炸死好多人呢! 未死既份工朝不保夕, 敢買又有幾多人?

匿名 說...

其實講真,我覺得下一次香港經濟崩潰將會如日本一樣半身不死(或許更差),樓價同樣高昂, 經濟實體更是虛浮(只有Financial Alchemy and Tourism) ,到時或許樓價會更差LA, 我是來幫80 後打打氣, 到時再慢慢買平樓

匿名 說...

敢問12:53朋友:
你拿了多少個好市民獎??????
你為社會做了什麼貢獻??????
10大傑青有你份未??????
10大低能青年應該你第一。

匿名 說...

同80後打氣,真係嘥鬼氣。
佢地仲衰個D乞衣,惡到呢。。。。
我想將佢地打柴就真。。。。

柒加伍 說...

我覺得依家有D似94-97年咁.....

係喔。如果的人唔爭住買樓,啲樓價點起?地產商點可以搶你啲錢?
香港人唔好再只怪別人啦!

匿名 說...

喂12:53果位細路:
收聲當幫忙。你戎奶未?
60後大叔上

匿名 說...

我都是80 後, 但我都頂佢班80後, 入唔到大行做, 沒錢買樓是應份的
物竟天擇,適者生存, 你沒本事, 就請你們收聲, 唔好阻人發逹 ,自由經濟中, 你沒料到, 教你班80 後一樣野, 阻人發逹如同
刹人父母

匿名 說...

我估12:53唔係未戎奶,
而係佢唔夠奶飲,營養不足,
所以,佢個腦同把口因而思緒混亂,
吸收及表達能力不足之餘,
又無人肯照顧佢,
先迫不得意硬要政府接濟去一世。

政府已經供書教學,而家佢畢業,
就話要置業,下一步,佢地就會要求政府幫佢搵老婆(仲指明要樣靚身栽正個D),再下一步,就會要求政府津貼佢地奶粉錢(仲指明要日本貨),再下一步......直至死時,要政府預備埋棺材山地....

我倡議佢地咁唔LIKE,咁悲慘,不如早登極樂好過啦。

匿名 說...

而家佢畢業,就話要置業
樓上講得好岩, 正正係好多大學生心態
買唔到係自己無本事, 唔係社會欠你的.
少玩Facebook / 微博 / online game
少D與負能量的人接觸, 以免互相影響
多D與積極進取既人交流, 努力搵錢好過啦.

匿名 說...

果班叫晒救命既80後契弟,
完全係物質怪獸,滿腦子都同物質有關,嫌三嫌四,俾港女更討厭。

港女們,你們遇上競敵了。

匿名 說...

或者可以咁講,港女們,你們有接班人了。

匿名 說...

大部份80後祇是要求一個較公平的社會, 一個可以較公平地分享經濟增長成果的社會, 誰知竟被一些蠻不講理的人破口大罵, 罵他們不思進取, 衰過乞兒, 稱呼他們契弟, 這些反80後的人有沒有基本的思考能力, 有沒有一點理性, 對社會的不公平狀況有沒有一點反思, 頗成疑問.

匿名 說...

我只知天理循環, 因果報應
香港的百年大運而走到最後一程,將百年聚下來的東西用得一乾二淨,資源, 人力 和良知
80後我不是來幫你們說話的,別誤會, 先因後果, 你們父母種的因, 就是你們受的果 , 不竟禍去禍來皆自招,不用怨人

相信香港下次的盛極而敗, 恐怕不再是單純的BUSINESS CYCLE,上海70 年前早而有皇星相助, 紫氣護身, 卻因人禍將一切給了香港, 今日上海已經恢復元氣, 將會由香港取回一切 ,而這一切就會在下一次熊市之時, 事已致此, 沒力再留

今日的人力就如蝸牛,不過就請不要起居屋, 樣樓市作最後的狂衝, 為我們香港最後的火花放得更美好吧, 年青人, 香港已不是可以英雄造時勢的地方, 更不是你們的地方, 你們還有一点骨氣的,就滾出香港, 成也敗也,都叫對得自己

匿名 說...

哈,你叫80後唔LIKE既滾出香港,
你真天真,你叫佢地滾,佢會同你講佢地要你貼錢俾佢佢先走(仲指明要坐頭等飛美國果D)。
有網友不滿某網友用乞丐,契弟來形容可惡的80後,唔用乞丐,契弟,純係一種語言表達,形同叫佢地PK,網友好克制,無講粗口同問候佢地家人同祖先18代,都算口下留情啦係話。

唔通你想請佢地食大餐同飲香檳以鼓勵佢地夠沙膽死唔要面要政府養佢一世。

我唔開火炮射佢地上宇宙,已經好俾面仍地啦大佬。

呢班乞丐契弟,又要囉錢,又死要面,一句都唔俾人鬧得??????

你話我無用嫁,我又無問政府攞錢,
我衰口賤,又無講粗口。
我知自己事,你有心,唔好因為我口賤,
就睇得個世界咁灰。

一件事還一件事,我口賤,
但我靠自己。

閒事仲會捐下血,買下棋,
讓下座比老人家....

匿名 說...

講到社會不公平,你都真係火星人托世。

你5隻手指都有長短,邊有人隻隻手指一樣長,咁D手指有長有短,你想點叫佢地隻隻公平D,要隻隻一樣長呀?

呢個世界,好多野都好難爭取嫁,傻仔。

世界和平,幾時有試過呀?????
社會公平,你咪發夢啦??????
有生無老,更加無人試過啦????

你咪傻啦,社會公平?????

四肢健全,已經執到,要謝天謝地啦。

仲要奢望社會公平?????
等我呸你幾下笑下你先。

細佬,睇死你皮薄,俾我笑完實慶過辣雞。

要還拖,免喇,我屎急,要去痾屎先。

匿名 說...

呢個話題相信係冇結果的,不過爭拗下都幾精彩既.唔拗點知問題所在.

向果的只係講支持乜乜,support 某某的廢人致上永無止境的慰問.

老占 說...

大口仔的文章唔回唔得, 我對復建居民無特別意見, 我唔相信復建居民會衝擊樓價。

我所說的是, 而家的香港人, 不只八十後, 只懂去埋怨政府, 咩都要政府幫, 唔幫就鬧政府。其實近十年香港樓價多次插水, 要買樓大把機會啦, 個時又唔買?

董建華個時八萬五, d 議員本來讚成, 好多低下階層市民舉腳讚成, 但出事後卻個個忘記左自己本身舉腳讚成.而改為去鬧董建華. 今日, 政府仲敢貿然壓樓梯?

KT 說...

題外話

我以前去外國exchange,d外國人話覺得中國人,尢其香港人好勤力,十分讚賞…

依家我公司個外國人上司話依家d大學生一代不如一代…根根計較

KT 說...

還有,居屋個人入息限額11k....80後真係搵咁少????

還有,我想業主們都太厚道了,樓價重創果時無出黎鬼剎咁嘈

匿名 說...

80後真係搵咁少??????

佢地?????

佢地係搵得少,又要洗得多,又大貪,
又急功近利,又生不逄時,又窮又"DULL""MOU",又短視......
咁咪要迫於無耐發政府窮惡囉。

我痾完屎又番呢口賤過添,罪過罪過。

匿名 說...

早年, 樓價大瀉時, 自由黨班人破天荒上街遊行, 但他們好像忘記了: 曾經大力鼓吹及支持政府提供低息貸款給中產人士置業的就是他們.

貸款給原先沒有能力置業的人成為業主, 很有可能是靠害他們, 但由於可以增加需求, 令地產商得益, 自由黨大力支持. 真正幫助中產置業的方法是增加供應, 從而遏抑樓價, 但地產商的暴利就會減少. 權衡輕重, 前港英政府選擇興建居屋, 現時的特區政府選擇支持地產商, 不願復建居屋, 畢竟, 特首的位子要坐得穩, 有賴地產商的支持.

匿名 說...

"大部份80後祇是要求一個較公平的社會, 一個可以較公平地分享經濟增長成果的社會"-- 不用勤奮 也能 公平地分享經濟增長成果 ???

匿名 說...

地產商得益,在於第一手新樓市場買賣。

其後的二手買賣,係唔關地產商事,與地產商無關,二手買賣利潤,全歸一手或上手業主。
(呢點,大家要慢慢消化,才可明白。)

如果一手樓開價低,三千蚊一呎,你估第一時間反對既係邊位???????

肯定肯定好肯定,果批玩有業主。

而家呢個勢,係你地班友痕上車,
班一手同二手既地產商同業主,
仲唔襯你恨攞你身家。

你地唔小心露左底,俾人發現你痕買樓,仲唔哈哈,殺你一頸血。

你願者上釣,賴政府唔幫你穩定樓價,
不如你地自己醒少少,
扮晒野話寧願瞓街都唔買樓。

你地齊心合力罷買一二手樓,
寧願長租都唔買,睇下到時個勢又會唔會係你地到囉。

我係政府,緊係唔插手啦,
未死過咩?

幫你地班窮鬼,就俾地產商同一二手業主丙,
幫班地產商同一二手業主,就俾班窮鬼咬。

你係政府,你會點先,
真係左右做人難呀,大佬丙。

匿名 說...

政府唔會左右做人難, 政府一向支持地產商, 否則, 他們冇能力成為世界級富豪.

匿名 說...

地產商 "不用勤奮 也能 {比別人更}公平地分享經濟增長成果".

RL 說...

no, even in property market, only few property developer survive since 1970s to now
how to you know property developer is not working hard? just you think that, dont 'eye red' others, think abt how to achieve what you need

匿名 說...

有D白痴仔仲話薪金追唔上樓價
大佬, 任何大城市美國/倫敦/東京/北京/上海都係咁啦! 香港90年代都係咁啦!
儲唔到首期咪慢慢儲囉, 你估價格永遠有升無趺咩! 等下啦!
再唔係租樓先囉, 新界大把平樓租啦, 坐下車使死咩! 無能力無本事咪咁大想頭學人買樓!
復建居屋解決唔到問題. 熱錢, 低息及羊群效應先係升市原因.

匿名 說...

地產商 "不用勤奮 也能 {比別人更}公平地分享經濟增長成果".-- 地產商投資金額有大? 無知眼紅病!

匿名 說...

go to midland web to search any property within range 1m to 2m, there are many choices

匿名 說...

"政府唔會左右做人難, 政府一向支持地產商, 否則, 他們冇能力成為世界級富豪" ---太看低地產商的能力,他們能力都比你們高

匿名 說...

80後有無100萬人口。
我估應該無100萬都有70萬人。
當中佢地都屬適婚年齡。
應該係時候成家立室,與愛人組織家庭。
佢地有個安樂居所,實是可以理解。

60-70萬人口(我估),真係唔係小數目。
如果政府要幫佢地上樓,真係要小心謹慎。

如果興建好似公屋,
遠少少同細少少你地接唔接受到。
租俾你地,結婚人士及最窮人士上樓先。
年年都要入息審查,一超標就即走。

假設你有結婚需要,10萬個單位夠唔夠招呼呢班80後?(始終佢地20幾30歲人想有個家或有個竇,係可以理解既。

如果佢地真係有需要同真係無錢,
阿爸阿媽又唔出手幫助,
佢地問政府係情有可原,
但請你們可否好似我咁,
攞少少客觀數字,
讓數字去代你們發聲,
而唔係一味大聲,好似攞債咁呢?

咁啦,一人行一步,起住5萬個廉租單位,
地點遠D同內籠細D簡陋D你地暫住,你地又制唔制先,肯唔肯屈就下先。

到你還晒GRANT LOAN,又升左職又加左人工...成為富戶向上游就交番間屋出嚟俾90後...

你地點睇?

起D廉價粗野你頂住檔,你地制唔制?

借錢就免喇。

咁樣個樓價就一定長升長有。

復見廉價粗野公屋,間屋係政府既,
你經濟有好轉,就要走人,
更上一層樓,自己出去租私樓或買私樓,
努力向上游而唔好賴死係公屋唔走。

唔知我表達得清唔清楚?

好死眼瞓,唔講喇,
你明唔明同同唔同意係閣下既事。
唔洗回我,我吹水咋,唔洗認真。

80後,明白你地既苦況同苦衷,
希望在明天,請政府出手相助,
都可以客客氣氣,人家政府高官,
又唔係聾又唔係低能。
你地有事慢慢講,唔好下下都奉旨,
人地幫你都幫的條氣順D啦。

將心比己,你尊重我時我尊重下你啦。

匿名 說...

"太看低地產商的能力,他們能力都比你們高"----地產商搞官商勾結的能力絕對不能低估, 他們的能力不一定比我們高, 但一定比政府官員高, 許多政府高官退休後都去為地產商打工.

匿名 說...

"太看低地產商的能力,他們能力都比你們高"----地產商搞官商勾結的能力絕對不能低估, 他們的能力不一定比我們高, 但一定比政府官員高, 許多政府高官退休後都去為地產商打工 --->自大,無知,眼紅

匿名 說...

喂,上面果兩位:
仲細呀你地,係到玩鬥咀?

不敗的魔術師 說...

我都加上一腳。

見到大口仔訓街

匿名 說...

買冬天衫夏天衫...

其實想儲錢的人會盡量少買衫。連夏天買冬天,冬天買夏天亦省掉。一件衫其實可以著好耐。

當然又要新,又要時尚,緊贴潮流,當另作別論。

不過咁,我同意香港的財富太集中於地產財圑手中。變成大部份人都變成為地產商打工。

努力工作是可以置業的,我們亦可以降低要求,但大家一同參與一個遊戲,規則卻由地產商來定,這正是令人憤憤不平的地方。

積極向上永遠都對,亦應提倡。但遊戲規則被扭曲時,希望有人撥亂反正的訴求應不算過份。

Related Posts with Thumbnails