早前在筆記內設定了一個有關樓市的意見調查....
如果你買新樓自住, 究竟你會選"A"定"B"?
A. 超豪會所, 實用近7成
B. 頹會所, 實用有8成半
一個月過去，總共有161位讀者參加投票。選擇"A"的讀者只有20位(佔13%)，選擇"B"的讀者有141位(佔87%)。大口仔相信本筆記讀者年齡介乎18至35為主(主觀感覺！？)，未來幾年應該屬於樓市的主要力量。投票結果清楚顯示大家都較喜歡高實用率的單位，寧願放棄豪華會所換取高實用率。
問題來了，大口仔相信香港的地產商都不是傻的(傻就唔會咁有錢)，點解佢地明知香港人鍾意高實用率都唔起多D呢類型既樓，硬係要起豪會所呢？
答案一字咁淺：錢！
唔起個豪華會所點賣你$12,000-$13,000一呎呀？
所以我地一係就接受現實買發水樓，一係就堅持己見買二手舊樓。坦白講，大口仔對買一手樓真係無乜好感。一來實用率太低，二來新樓價格不是由市場供求決定，成交價由發展商主導，一旦發樓商劈價清貨上唔到會真係喊都無謂。
仲係安於本份住下舊樓好過....
![[Most Recent Quotes from www.kitco.com]](http://www.kitconet.com/images/quote.gif)
10 則留言:
HK developers inherit 假大空 from mainland project bullshits.
要咁豪嘅會所做乜先？又唔係可以係入邊住喎，住嘅始終係自己個間屋，最緊要買翻嚟夠實用！問心個句，你去會所嘅時間多d定係屋企嘅時間多d？
又會有人話而家做嘢時間長無咁多時間喺屋企？咁我又諗，你放假個時都唔係屋企會係會所度多d架！唔排除會去會所，但個比例又會唔會多過係屋企呢？
我真係寧願住舊樓...又大又平..
豪華會所...都未必會成日用啦..
如果有咁多錢...投資係第二度仲好
JAY: 十二萬個同意，有幾何在屋企先？
RAYMOND: 我都係咁做，一間投資，一間自住，間屋仲大過住新樓。
我估我有資格講吓。我幾年前買咗一個有好多設施既會所的新樓。其實用率真係.....兩個人住就冇問題。到個仔出世,放張超細BB床入主人房,行都冇得行!
會所呢,除試過幾次游水,浄係試過周日冇嘢做去睇免費報紙。個人覺得超豪會所的最大得益者係一眾平日無皇管的傭工們!
最近買入一個31年連車位的舊樓,全屋無窗台,實用率超過85%,主人房放兩張大BB床都仲得。除客/飯廳外,仲設立一個偏廳,睇吓報紙嘆吓咖啡。
仔仔最喜愛由大門口大直路跑入書房,再跑返出去,大直路全長足足33呎,對佢來說已是成人跑100公呎!
新樓...我諗我唔會再買....
馬沙：你講BB床o既例子令我又諗返起衘龍山1200呎單位主人房的經典，夠膽死縮短張床到5呎3吋去"就"個錯覺俾買家？叻！
馬沙你講31年樓連車位係咪廣播道？大口仔都睇過，諗住遲兩三年搬過去呢....
廣播道貴咗好多,個人覺得有點不值了。如果同區比我揀,我選窩山,差不多樓齢!我兩度都睇過!廣播道無港鐵同對經常半夜收工的我不太方便。窩山交通好D!
不過我最後買咗東九龍某半山位置,晚上異常清靜,又近家母! (註:小兒白天由家母照顧)
馬沙：知唔知窩山校網好唔好呢？我都睇過窩山，但感覺上無廣播道環境咁好，不過係近東鐡同旺角。
雖然大口仔o岩o岩新屋入伙，但因為BB就出世，又要請工人，都有少少想買間大D同有工人房的舊樓住。
有冇介紹呢？如果可以send email去我筆記email: tabodiary@yahoo.com.hk話我知丫。謝謝！
大口仔,
因自己同朋友都有需要,我上年年尾睇咗好多樓。
以校網計,我估除正正九龍塘外,最好一定係廣播道、窩打老道及何文田山道。屬全九龍區最好的兩個校網!
以上全以近30年以上舊樓為主。廣播道對我不太方便,同樓層質數無咁企理!
窩山大部份近40年,但保養非常好。但以1,000呎-1,500呎為主。樓價好似好貴,但因呎數大,除開呎價其實算吸引。我有朋友父母住窩山頂,個廳大到呢,我地10幾20人上去,都仲得!
何文田山道有多D不同呎數,最細由700呎3房起,如果搵到近山腳,真的好方便!太平道個邊起至旺角好繁華,一過馬路由何文田山道起點,除住戶外,唔會有外人。所以我比較喜歡何文田山道!
三個地方都極少盤源,去到目的地求其找一間地產公司(間間盤源幾乎一樣),睇睇就知是否喜歡!
馬沙：多謝提供資料！廣播道同窩山我都睇過，兩者各有可取之處。反而何文田山道就未諗過，等我呢兩個星期安排睇下樓先。
有時間一齊交流下湊仔經，我日日有睇你個BLOG。 :)
發佈留言