借錢 (2)

多謝大家關心，大口仔直到依家都無借到錢俾我個死黨，亦無打算借....

有網友問大口仔我個朋友點解會欠落咁多街數，問我佢係咪借左孖展炒股票。事實佢係因為賭錢同女人先會泥足深陷，詳細情況唔方便再透露，但佢係一年內已經第二次犯上同一個錯誤，更甚者佢為左錢，開始連所有友情都押上。

大口仔之所以無借錢俾佢，最關鍵就係我發覺佢已經係第二次犯錯，理智話我知佢既問題唔係一個錢字咁簡單，而係佢理財上，嚴重話甚至係"生活模式"上出現左問題。呢D問題唔係一萬幾千可以解決到。所以我先好堅決咁拒絕左佢，了解佢欠債的問題出現係邊，幫佢搵資料去解決。

講真，大口仔見到呢個朋友咁都好心痛，因為佢曾經係一個讀書好叻、轉數好快的醒目仔，但可惜無論佢讀書幾叻轉數幾快都好，佢都仲未明白"理財"的重要性！

量入為出、不借錢投機、努力增加非工作收入這幾個簡單概念其實已經可以幫大家成為小富，講出黎好似好簡單，甚至有人會話"鬼唔知咩"，但事實話俾大口仔知，真係有好多人因為唔明白呢D咁簡單既道理而誤入歧途。

大口仔衷心希望死黨可以盡快回頭是岸，切莫將一個兩三年可解決的問題變成為影響一世人的問題！