2008年5月4日星期日

別人眼中的你

為自己做Marketing,最終目的係要為自己於公司內建立一個令人印象深刻的"品牌",一個代表你自己的"品牌"。

網友"平凡人-史路比"話自己於公司內比較蝕底,原因係因為自己比較靜。的確,如果本身性格係屬於文靜一類,要事事表現積極於人前難度極高。而文靜一族要老闆留意到自己表現亦相對較難。但好彩,公司團隊內亦需要不同類型的員工去平衡運作。試想想,如果團隊內個個都"講唔停",情況應該都會幾混亂。

大口仔於"為自己做Marketing"一文中提到的事事主動,不是叫大家有前無後打死罷就的,無的放矢地亂講一通,相反大家要盡量深思熟慮,開會時不要發夢,如有好意見時應盡量提出。其實文靜有文靜的好處,因為文靜但適當時候發表好意見的人,容易俾人一種冷靜聰敏的感覺。

無論你係文靜型又好,外向型又好,你有冇諗過你在公司內,老闆及同事面對的形象如何?

佢地會覺得你....

有能力?
有負任心?
"A"字膊 (沒有負任感)?
中心人物,公司無左你唔得?
演說能力極強?
分析力好?
處變不驚?
對公司有歸屬感?
組織力高?

以上只係"別人眼中的你"的一少部份,仲有好多好多不同的睇法可能會經由第三者加於你身上。千萬不要自輕你於公司內的一言一行,你的每個行為或決定都有可能影響你在別人眼中的"品牌"。

舉個例子,假設公司有個非常重要的項目要執行,但時間緊迫,於是老闆召開緊急會議商量對策。會議結果決定需要三個同事於週末回公司趕工。於是老闆公開問邊個願意回公司負責此事。通常這種情況,好多時員工都會你眼望我眼,敵不動我不動的等待,於是老闆會再問多次,結果工作就由最肯捱義氣的同事舉手擔任。

你有冇諗過其實你可以於老闆第一次要求時,立刻第一個舉手答應呢(如果時間真的許何)?如果你有咁做我相信老闆對你的印象一定會深刻好多,第二個舉手答應的人已經無左呢種效果。如果你往往都係身先士卒的一個,久而久之,你在老闆或同事心目中,就好大機會建立起一個有承擔,肯為公司搏的形象。

又例如開會,有個題目拋出來大家討論,你撫心自問,你有幾經常發表意見呢?你有冇用心去思考,然後將自己的想法講出來同其他人討論呢?意見的對與錯不是最重要,重要的是你要俾人一種有思考過才提出意見的形象。

上述係一些較常見的例子,話俾大家知何謂主動,主動又點樣可以幫大家建立起一個"別人眼中的你"....

老實講,老闆要提拔一個人,一定係一個形象鮮明,又符合公司要求的員工。如果你在老闆心目中印象糢糊,你的升職機會.....真係可想而知....

停一停,諗一諗,你公司要求管理層或你心儀職位究竟需要乜野特質,然後努力地去為自己建立呢個"品牌"吧!


相關文章:

4 則留言:

Jay 說...

好多謝大口仔分享職場求升之道,我由今日開始要多點留意機會,自己都知道自己平時並不是全心為公司,但係諗到若果真係升到職,收入應該會上升,距離財務自由又快一點,比我有無比動力去「promote」自己。

大口仔 說...

Jay:知道你努力追求財務自由,俾心機,一齊努力。如果要工作收入急速上升,升職會係最快同直接的方法。

記得初出道時於商務打書釘,無意中讀過一本書,叫在職者努力於5年內增加4倍薪金,當時印象好深,亦以此為目標。大口仔相信如果做到,除左滿足感外,金錢收入當然亦會水漲船高。

其實職場之道無魔法,細心點留意機會,主動一點已經可以贏到好多人。

匿名 說...

Thx for ur comment, very interesting and useful. Add oil! ^^

大口仔 說...

Michelle:多謝支持!

Related Posts with Thumbnails