2008年5月3日星期六

為自己做Marketing

之前提到,老闆要升你,不外乎因為以下幾點:

1. 你的能力不可替代
2. 你的升職對其他人有鼓舞作用
3. 你可以鞏固老闆的權力
4. 你於團隊的影響力較大
5. 你表現優異,但有離心
6. 最後一點比較特別,就係老闆唔鍾意你,想"升"你去第二個部門或團隊

你有冇諗過自己o係老闆或者同事們o既心目中,究竟屬於邊一類型?

現實黎講,能力不可替代的員工唔係無,不過極少。如果你認為自己於公司內的位置係不可取代,咁大口仔恭喜你之餘其實你應該已經升左職好耐,你可以唔需要再睇大口仔"談職場心得"呢個系列....

不過,好多時打工仔都係屬於後者,有能力但並非不可取代。如果你認為自己屬於呢類人,咁你o係老闆及同事心目中的形象就變得好重要。

大口仔見過無數例子,個員工能力高又肯搏肯做,但總係得唔到老闆賞識,得個"做"字。另一批人能力同前者一樣 (甚至稍差),但往往老闆就留意到呢批人,一有機會做俾空間呢班人發揮,跟住仲提拔埋佢地,扶搖直上。

原因呢?歸根究底都係因為"Marketing"呢個字。你有才幹又肯為公司賣命,但有冇諗過老闆知唔知道呢?老闆都係人,而且日理萬機,時間有限,你估佢會主動了解你幾咁有能力,又幾咁肯為公司賣命o既機會有幾大呢?得閒都陪下屋企人好過啦....

仲記得大口仔話"其實公司從來都唔重視你"嘛?

我可以大膽講句,如果你自己唔諗方法o係公司表現自己,你最後成功得到老闆賞識o既機會極細,除非你o既能力係不可取代啦。

要為自己做Marketing,首先你一定要變得主動,開會要主動、認頭工作要主動、參加公司活動要主動、幫同事要主動。中國人一般都唔習慣事事主動,就算有好意見都羞於啟齒,最後空有一身好本領但又苦無用武之地,更甚者會埋怨公司唔肯聽自己的"好意見",但其實當事人由頭到尾都無提出過自己的"好意見"....

只要你肯主動,你已經"為自己做Marketing"踏出重要已堅實的一步....

相關文章:

職場新人類
事實係....
自已靠自己
懷才不遇 vs 公公
再談公公 (回應"秋")

Related Posts with Thumbnails