出得黎行，預左要還？

聯洲騙案發展至今，警方拘留8個涉人士，有18間銀行中招批左貸款俾聯洲，當中包括匯豐、渣打、中銀等等，涉案總金額高達35.5億港元....

噚晚返屋企食飯，食完飯後，老豆無端端問：「阿仔，無事丫嘛？」

我帶點"得戚"咁反問：「我點會有事？」(其實都唔知老豆做乜爆句咁感性o既問候。)

老豆：「聯洲單野，你無份丫嘛？」

我一聽到即刻笑到跌左落地下，跟住講：「梗係唔關我事啦！一來我無本事識到黃生呢d咁有勢力o既人，二來香港咁多公司，點會咁o岩係我負責先？」

老豆聽完滿意咁點點頭，繼續同老媽子追看由大陸買返黎的正牌翻版韓劇。

不過講真，講就咁講o者，但我心諗今時今日做銀行真係好難做....

你唔勇d主動出擊，批多d Loan俾各大、中、小型公司，你今年個target點會到數？聯洲呢d"表面上咁靚仔"o既公司，係遇唔到o者，如果我遇到都一樣中招。就好似o個個前花旗CEO話齋，個舞會音樂一日未停，參與舞會o既人係唔會停落黎o既.....

不過，如果無記錯，講呢句說話o個個前花旗CEO都已經被迫離開左個舞會場地。

唔通真係好似無間道o既韓深咁講：出得黎行，預左要還？

大家都係各取所需o者，風險管理係到左數之後講o既....

PS. 唔記得同大家介紹，我叫TABO，現於香港某大銀行呃緊飯食，職責係向公司客"放數"同"管錢"，行年28，典型香港仔一名，體內流o既係香港血，即係天生愛錢，所以職業都選擇以錢為伴....