匯豐股東的心情

如果唔講埋個股價俾你知，你可能會以為上圖係與中國相關的某股份。不過睇埋個股價，相信你好大機會估到上圖係匯豐近兩個月的股價圖....

作為匯豐小股東，睇到愛股呢幅咁強的股價上升圖，開心指數不升反跌。個人認為尚有一年時間於低位慢慢收集匯豐股票，再享受複息增長，但呢個如意算盤似乎打不響。基本上呢次匯豐由低位$105升至現水平$136 (計埋早前第四季除息$3.x，其實已升回$140水平)，大口仔的心情仲差過佢從$130跌至$105那一段。

早前大口仔於匯豐公佈2007年全年業績後估計匯豐股價，於2008年在$105至135之間橫行。事實係匯豐用左兩個月就打破左大口仔的所謂估計。結果除左證明大口仔係二打六兼正宗散戶一名，所作估計其實相當斷估之外，仲證明左市場的所謂"共識"十之八九係錯既.....

當大家睇死、冷落某優質股，往往就係該股見低之時。網友巴林話"當日身邊好多親戚、朋友及同事就係希望$100蚊以下買進，因為他們見到大行報告把目標價愈調愈低，最後當然什麼也沒有買到，而我更相信他們大部份人當匯控低於$100還是不會買進，因為他們恐懼。"。大口仔身邊的同事、親戚及朋友又何嘗不是。

上圖亦顯示到匯豐近期的上升同成交並不配合，股價升，但成交額跌至甚低水平。市場係不信匯豐今年長升長有，定還是持貨者都惜貨如金呢？大家不妨留意匯豐股價同成交水平的走勢比較，可能會有相當啟示。

執筆之時，美國公佈最近失業數據較預期為佳，微跌至5%。紀勤話美國樓斷供率同失業率的關聯性較房屋銷售價格高，如此這般，我呢個匯豐小股東的心情今晚應該都唔會好到那裡....

相關文章：

匯豐2007年業績 (預測)
匯豐股價短期預測 (2007年全年業績後6個月)
匯豐2007年業績分析 (1) - 市場反應解讀
匯豐2007年業績分析 (2) - 減值撥備、撇賬
匯豐2007年業績分析 (3) - 個人理財
高盛升匯控評級至「買入」，目標價升至１５０元