大口仔投資週記 (2008年第31週)

經過兩個星期的大上大落走勢，今個星期可以算得上係"悶市"，因為指數走勢係有波幅無升幅，各路等緊"終極大熊市"來臨的英雄好漢，係咪好失望呢？

基金現金多，熊市不會來？

星期三的信報投資者日記，曹仁超先生引用了一個好有趣的數據，曹Sir指出現時美國各大基金共持有現金高達3.36萬億美元，相當於美國整體股票市值12.39萬億美元的27%。基金的現金水平如此高，代表了很多基金經理都不看好後市，大家(可能包括你同我)都一齊引頸以待一次"終極大熊市"的到來，然後施施然以賭神式的步姿，手持一疊疊現金入場掃貨！

喂！喂！喂！訓醒未呀？細個阿媽無教你"邊道有咁大隻蛤蟆除街跳"呢個道理咩？我有理由相信曹Sir的推論係對的，就係：一、人人等緊的"終極大熊市"不會在大家預期的時間內出現；二、今次熊市二期的時間相當長，即係陰D陰D咁跌，直至有新的轉捩點出現為止。

由次按到信貸收縮

有時大口仔好懷疑，市場上有幾多散戶會了解由次按引申出來的信貸收縮問題，究竟有咩影響及嚴重性在哪裡。當大家都開始認識何為次按、何為CDO、何為SIV之際，歐美各大銀行正因為要為次按相關投資作出巨額撥備，而不得不收緊本身的放貸資產規模。

銀行收緊放貸規模，最直接受影響的當然係銀行本身，因為銀行能夠從放貸中賺取的利息減少了。不過，商業市場上的各大、中、小型企業都不好過，因為市場上能夠借到平錢的供應少了，但因為要應乎經濟逆轉而急需資金週轉的企業相對較多，各公司對錢的需求相反地增加了不少。如果你有讀ECON101，你應該好清楚"需求大於供應"的結果....

最優質的企業仍然會借到錢，不過利息超貴，所以盈利減少。第二、第三級企業因為無辦法搵銀行肯提供財務支援，最終因週轉不靈而相繼倒閉，結果導致失業率繼續增加，樓價又因失業率上升而進一步下跌，直到經濟跌到另一個支持點，有實力的企業將次一級的同業收購合併始盡，經濟才會進入下一個循環。

好恐怖？係呀！不過現時美英的經濟走向好大機會跟據上述的情況慢慢發展下去，大口仔亦越來越相信美英的股票市場及樓市將步入一個漫長的下跌市。而中港股票市場方面，我則維持5月份的估計，香港及中國股市進入漫長的上落市，有波幅但無明顯升幅，為期1至2年。

資產分配進行情況

經濟差唔代表市場上無贏家，亦唔代表大家要完全將投資活動停止，大口仔已於上星期啟動所有月供計劃，熊市幾時來我都會開開心心地面對。