2008年10月1日星期三

後局

美國救市方案被否決,人人都以為世界末日,包括大口仔本人,但市場先生往往喜歡玩弄群眾,即日來個反高潮,問你服未?

當冷靜下來細心推敲"救市方案"的後局發展,得出的結論係方案於第一次呈交眾議院通過唔到反而仲好,我係咁樣諗的....

  1. 方案未能"首讀"通過,令全球金融市場大波動,各地政府已經有切膚之痛,即日澳洲、法國及中國官員走出來"嚴重干預"美國內政,大力呼籲美國議員要通過方案,同時自己亦無可奈何地增加本國的救市力度,造成全球政府同時大救市,效果一定好過美國單拖救市。
  2. 大口仔相信方案最終"必定"會以某種形式獲得通過,某種形式的意思是加入更多有利美國納稅人的條款,昨晚布殊放風話將存款保證金由10萬美金加到25萬,結果令最後通過的方案必定更龐大及有利市況。
  3. 方案被否決後,全球政府已加快推行刺激經濟方案及各種救市措施,市場明白當中風險後,大口仔相信於股市層面會既急且快地調整到底,對投資者來說未必係壞事。

我相信今次金融風暴已經進入"後局",美國政府已強勢對市場進行干預,將美國各金融機構進行整合,主要的商業銀行剩返五間,分別係美銀、花旗、富國、高盛及摩通,美國金融業的"交易對手風險"於整合後將大幅降低,市況會趨於平穩。

反而金融風暴的風眼將會從美國移向歐洲及亞洲,富通及B&B已經為歐洲的金融風暴揭開序幕,往後要看歐洲人能否似美國般以狂風掃落葉的方式將較弱的金融機構接管或合併,整個金融風暴亦會隨住歐洲金融業完成整合步入"終局"。

幾時?不遠矣....

9 則留言:

匿名 說...

我未打算投身掃街行業 , 香港都唔係好多會落葉樹 , 搵食奸難 嘿嘿嘿

匿名 說...

這是否估計港股已見底呢 ?

大口仔 說...

匿名:大口仔認為投資美國相關的股票風險越來越少,潛在回報越來越高。

N/A 說...

大口仔,
我都認同美國國會最終會通過方案,而美國市場風險已大為降低,但係中小銀行倒閉風險仍大。

歐洲昨日連番拯救多間銀行,反映左歐洲國家都已經積極介入拯救金融機構。個人比較擔心英國市場,B&B 之前都有HBOS 和較早前的北石,呢幾間銀行都係主要的貸款銀行,而匯控在風暴之初曾表示會作出合適收購但未有實質行動。是否匯控預視英國市場出現問題預留現金 ? 在英國擔任摩通在美國的救火角色 ? 還是合適的獵物未出現呢 ?

匿名 說...

我想問將存款保證金由10萬美金加到25萬,銀行會增加幾多成本?

大口仔 說...

巴林:中小型銀行倒閉的影響力有限。匯控未作出收購主要想保留充足流動資金到最後,個人極贊成此策略,市場的反應亦明確默許了此策略是受歡迎的。

味皇:報告未有提及,但估計不多,如能保持存戶信心,多多都值。

匿名 說...

>>大口仔認為投資美國相關的股票風險越來越少,潛在回報越來越高。

在港有冇有相關產品掛牌?

匿名 說...

如果走出谷底...拆息就唔會推到咁高...
拆息一日唔回軟
一日未到底~

大口仔 說...

kin992:匯控、宏利、利豐....

SP:拆息只係其中一個因素,但高拆息真係不尋常。

Related Posts with Thumbnails