恆生及中銀香港的資產質素

網友Daisy想大口仔詳細一點分析恆生的資產資質及華互事件對恆生的影響，同時，大口仔又見有不少網友將中銀同恆生作比較，心想不如趁機會分析下兩間銀行的資產質素的分別，先看看兩間銀行的證券投資在2008年上半年業績報告的披露：


報紙話恆生持有金融機構債券比重佔總資產的22%比例好高好危險，但大口仔想反問如果銀行的剩餘資金唔買債券可以買乜？有睇之前大口仔解釋銀行基本運作的讀者會知道，銀行吸收了存款要賺錢有兩個主要途徑，分別係貸款及投資，投資組合則可有不同選擇去追求不同回報。

恆生的選擇係125億公共機構債券、130億企業債券及1,561億金融機構債券，分別佔總資產7,479億的1.67%、1.74%及20.9%，總共24.3% (見上圖)。客戶貸款為3,372億，佔總資產的45.1%。此外，恆生披露了在其1,561億金融機構債券中，並無持有資產抵押證券，即持倉大部分屬於金融機構的高級債券。

中銀的選擇係430億公共機構債券、598億企業債券及1,600億金融機構債券，分別佔總資產11,272億的3.8%、5.3%及14.2%，總共23.3% (見上圖)。客戶貸款為4,871億，佔總資產的43.21%。此外，中銀披露了在其1,600億金融機構債券組合中，持有次按扺押證券8.94億、Alt-A資產扺押證券32.15億、Prime資產扺押證券為66.23億，三者合共佔中銀金融機構債券持倉的6.7%或總資產的0.95%。

大口仔想問大家，企業債券安全定金融機構的債券安全？資產扺押證券安全定金融機構債券安全？恆生同中銀的資產分佈其實都差不多，投資佔23%-25%，貸款佔43-45%，不過恆生無沾手按揭抵證券，如果投資者只睇死數唔睇資產組合分佈，好容易俾人當傻仔咁玩。

銀行持有的債券，不論係公司債券或金融機構債券，都一定會做風險管理，做得風險管理，一定會控制集中風險 (concentration risk)，雖然銀行唔會拉起件衫被人任睇持倉狀況，但大口仔有理由相信恆生的1,600億金融機構債券持倉，由超過100間不同金融機構發出的高級債組成，再按不同風險評級或了解程度決定持倉水平，我斷估一間公司的持倉不會超過20億，而就算發債公司倒閉，高級債的債權人仍然有可能最終取於本金的60-80%。

恆生持有的金融機構債券在銀行資產中已經屬最安全的類別，除非投資者認為所有金融機構都會倒閉，否則恆生在眾多銀行股中仍然屬於最安全的一間。其實恆生早前的公佈已經強調華互資產對恆生來說金額不大，對盈利影響甚微，按例無須披露，亦不可能每有消息就公布一次。只不過市場對任何壞消息都極度恐慌，才令到恆生的股價有較大衝擊。

唔公布就一定係恆生隱惡揚善？真係無可能因為華互事件對恆生影響輕微所以唔公布咩？

PS. 迷債事件越演越烈，主要分銷商中銀今次都幾濕滯....