銀行的基本運作情況 (1)

試想像你同朋友拎$100出來開銀行，政府要求你每借出$1,000就要有$100資金在手，其中$8仲要係自己真金白銀拎出來做生意的。

一切準備就緒，你開始在市場上宣傳，叫其他人存錢入你間銀行，你為存款者提供3%年息以吸引市民將血汗錢存入。點解你幫人保管存款，你仲要付出利息而唔係收保管費？因為你同朋友都有信心，用3%吸納的存款可以用8%借俾企業家做生意，或者將餘錢投資於股票或債券上，一加一減都應該有賺頭。

3%利息的確雞脾打人牙骹軟，好快你就吸納到$1,000存款，加上你的$100本金，你總共有$1,100可以運用來產生收入。由於有政府管制及市場貸款需求有限，你不可能盡借$1,100俾其他人賺錢，賺5%息差。你可能會借$800俾企業家做生意收8%利息，剩返$300可以做投資，買股票或債券，總之要有投資收益，拉均的投資回報可以做到4%，仲有你同拍擋為客人提供各種增值服務，賣其他金融產品，山大斬埋有柴，服務收入為你帶來$10收入。

於是乎，你間銀行憑$1,100資產，每年產生($800x8%+300x4%-$1,000x3%+$10)=$56！

假設你唔派息，你第二年的資產剩值係($1,100-$1,000+$56)= $156。假設你間銀行的市盈率係10倍，市值等如$560，市帳率就係3.59倍。

根據以上簡單到不得了的假設情況，請回答以下問題：

你間銀行的淨利息收益率=？

你間銀行的總資產回報率=？

點解你間銀行的市帳率可以高達3.15倍？但匯控只值1.42倍？花旗更只值0.95倍？