2008年立法會選舉雜感

今日同同事參加一個學生營商計劃的開幕講座，講座開始前相約在大口仔至愛的茶餐廳食飯吹水，講開聽日便是2008年立法會選舉的投票日，談到候選人的質素....真係....

如果大家有間唔中收睇立法會辯論，聽到尊貴的立法會議員那種人身攻擊的問題及答非所問的答案，聽到候選人連香港每年財政收入、綜緩支出、教育支出有幾多都唔知，但又大談政府應該還富於民，大加福利的同時，你好有可能會同大口仔一樣，會有幾秒鐘贊同中央政府偉大的領導人─香港人未準備好雙普選！

但想深一層，即刻將那想法掉落咸水海，因為我相信議員的質素同香港的政治生態環境息息相關，議員及候選人的水平低落同香港人的質素應無關係。自大口仔"懂事"以來，有印象的全職立法會議員來來去去都是那幾個面孔。你叫他們退下來讓新人上場？大家有冇諗過他們退下來之後的下場會如何？

唔係個個都好似李柱銘、陳方安生咁疊水，話唔選就唔選。香港亦唔似歐美的政治環境，有充足的工作機會讓從政人士發展。好似李永達堂堂民主黨前主席，十幾年前放棄教席全職參政，選到今時今日佢可以退選讓新人上咩？可以既....但之後佢可以做乜？一家大細又點算？

舊人唔退，思維漸老，新人無位可上，亦預計從政的發展空間有限，試問一眾香港叻仔叻女又點會"落搭"？香港有幾多個陳克勤有政府關照"高薪養廉"？有幾多個大律師陳淑莊"以身試險"？有幾多個龔耀輝(方卓如)大把條件"唔優做"？

要香港的政治有睇頭？看來唯一的出路還是普選一途。

為了盡公民責任，明天大口仔還是會投票的，亦呼籲大家踴躍投票！