司機大哥的一席話

早兩日搭的士，途中因為悶便開始與司機大哥吹起水來 (大口老婆話我開始阿叔化)....

大口仔：「司機大哥，最近生意好唔好？」

司機大哥：「一時時，有時好運遇到去機場的客人，一日都搵到幾百蚊，有時運滯，剛好搵返"(煤)氣錢"。」

大口仔：「呢架的士你係租定買架？租幾錢？買又幾錢？我想八掛下o者」

司機大哥：「租架，依家咁貴點買得起，夜更租三百，日更仲要貴少少，你都買返架的士收租啦，三百五十萬一架。」

大口仔：「的士市場俾三幾個勢力人士玩哂，好似玩唔過喎，我做銀行都知少少行情。」

司機大哥：「係呀！你都識野喎，我以前高峰期有四架的士，1985年賣哂俾人，二十萬買返黎，二十六萬賣哂俾人，再租返來搵食，諗住賺到廿萬(6X4)好巴閉，鬼知今時今日漲到三百五十萬一個牌咩？o個時我仲有兩個舖o係聯合，又係賺幾萬賣左....」

大口仔即時諗起以下兩句曾經同大家分享，自己亦十分喜歡的說話：

富人不喜歡金錢，只喜歡資產，因為資產往往會為他們帶來更多金錢
窮人只喜歡金錢，而不愛資產，他們往往喜歡以賤價將資產賣給富人

據司機大哥透露，佢今時今日的工作收入同90年代一樣，都係每月萬零蚊，要納稅而且唔太穩定。但如果佢當年唔將佢的資產賤賣俾其他人，佢今日最少都有8-10萬穩定的正現金流收入，而且仲未計4個的士牌及兩個舖位的資產升值收益。

你同我今日要做的，不是賤賣資產，我地要為自己及下一代發掘及積累有升值潛力、可產生正現金流的資產。努力！努力！