大口仔投資週記 (2008年第37週)

如果你過去一星期去左旅行，或者因工作忙碌無時間睇市，你好可能會以為呢幾日的市況係牛皮偏穩。但實情係，股票市場因雷曼倒閉及AIG告急而翻天覆地。週四，各國央行聯手入市及市傳中央入市買三行，亦況才極速回穩。週五，傳出美國計劃推出更大規模的救市措拖，股票市場更瘋狂地上升....

救市不是入市的理由

美國救市，中國又救市，問題應該係點解政府要救市？答案係兩國經濟出現結構性問題，美國如是，中國亦如是....

中美政府有得選擇嗎？美國政府層經嘗試用道德作理由，放棄拯救雷曼，但市場以崩盤來回應，事後美國政府氣急敗壞的宣佈借錢俾AIG，令市場避開了另一個更大的金融風暴。其實你同我都應該暗中慶幸....

中國很安全嗎？當大家都說中國經濟衰極都有6%增長，情況點都好過歐美市場，但市場先生話俾我地知，中國股市跌幅大於歐美、人民幣開始轉升為跌、大量中小企將會(已經)倒閉、樓價開始下(暴)跌、出口開始減少，最後，中央開始救市....

容許大口仔做多一次醜人，救市不是入市的理由，不要被救市措施沖昏頭腦，嚴格審視持股，重整及優化持股組合....

不要相信大口仔！

可能係大市波動的關係，網友們都希望從各種途徑獲得投資意見，大口仔筆記的單日瀏覽人次於上週屢創新高，最高達1883人次。回想今年一月開BLOG時，每日有100人次瀏覽已經令我雀躍不已，想不到9個月後的今日，竟然有18倍增長。

能夠得到大家的認同，大口仔故然開心，但我亦怕大家都忘記了我寫BLOG初期一直強調的自學精神。我希望大家不要單單看了大口仔的分析或投資取向，便不加思索地相信大口仔的投資選擇，在不清不楚的情況下作了投資決定。

各位網友，請不要相信大口仔！請盡量花點時間了解自己的投資，大口仔的意見只可當作部分參考，大口仔是大家投資路上的朋友，但不是預言者。