一仗功成萬骨枯

某日晏晝，銅鑼灣午餐吹水會議....

「喂....你地有冇睇壹周刊？單野終於都爆左出黎....」在"渣兜"銀行企業銀行部任職，甚得老闆歡心的"偉文"故作神秘地講。

飯局中的其餘三人，包括我自己，都不約而同想起近日在銀行界鬧得非常火熱的一單新聞。

在"兜把星"CIBM搵食，平時講野大大聲的"康記"率先發難：「駛唔駛講得咁細聲？阿黎生本雜誌咁賣得，依家通街都知啦！你講鴻興印刷賣盤單野丫嘛？」

聽到康記咁講，我又加入呢個話題：「唉....真係聽到都心酸，人地任老先生幾十年來苦心經營印刷廠，就係因為一張可能佢都唔係好睇得明o既息口掛鉤投資合約，要拱手將一生心血白白送俾私幕基金.....真係於心何忍呢？」。

其實我一早已經從公司內部線人知道呢件事，敝行某同事都有同任生"做成"呢單一仗功成萬骨枯的生意....

「TABO，唔好扮好人啦，俾著係你，你做唔做先？賣得成呢張"I KILL YOU LATER"，分分鐘全年INVESTMENT都到數。話唔定獎都有得拎，即刻升職加人工tim呀！況且任生同佢公司個FC都有責任家嘛！唔通佢地睇唔明都買咯喎？」最後一個午餐會參與者，於"渣旗"銀行甚吃得開的"SAM"，用幸災樂禍的語氣講出呢幾句說話。

我無再出聲，只係以兩聲苦笑回應SAM的風涼說話....

我當然知道銀行係一個弱肉強食o既世界，好多時我地只爭朝夕。想做到從客戶出發的宗旨，在激烈的競爭環境下，銀行家們多數都會將呢個所謂"宗旨"放進床下低，仲要搵個夾萬鎖實佢。

鴻興事件，任老闆在商場上打滾幾十年，最後被一張ACCUMULATER合約埋單，千年度行一朝喪，將大半生心血拱相讓俾私幕基金，你話負責鴻興印刷的銀行家應該開心定無奈？

我同偉文、康記同SAM年齡相近，差不多時間入行，現時分別在香港四大銀行的工商業務部搵食，平時得閒會出黎聚下，吹下水兼交換情報，交情甚好。

我地都相信我地四個之中，最少有一個在若干年後可以在香港的銀行界叱吒風雲....