安信兄弟

今時今日做賓架，形象可以話跌到落谷低。一個安信兄弟廣告，已經將一眾銀行佬的尊嚴完全粉碎....

在安信兩兄弟大唱：「憑自我，用兩手，追尋大意義。」，用大鐵鎚追擊信用卡怪的時候，市民大眾對於銀行家的印象仲可以有幾好？

仲有UA的幾句廣告歌詞，幾十年o既舊樓、層樓按左俾銀行同未補地會o既居屋，都無問題....

我諗今日市民都覺得問銀行借錢係易過食生菜的，你唔借大把銀行借俾我！

仲記得有一位銀行前輩曾經同我講：「Tabo，你真係唔好彩，呢個年頭先入銀行。過去o既好景你一D都享受唔到。今時今日做銀行，除左target之外就係跑數同爆數，毫無尊嚴可言。」

「以前係點架？」我一心想知道更多，因為前輩講得o岩，過去的好景我真係一無所知，因為我一出道就係咁辛苦。

「以前邊駛做？個個老闆都拍銀行門爭住請我地食飯，要我地貸款俾佢。邊駛sell乜野I&I，o個時工作就係食飯、吹水同食飯，然後同邊個熟有低押咪借錢俾佢囉，間公司唔掂就賣樓。薪高糧準福利好，準時收工，家庭生活美滿.....下刪一萬字。」前輩如是說....

我心諗，有冇咁筍？

不過當初入行真係有少少俾銀行行政人員形象吸引到，HUGO BOSS西裝、IWC皮錶、萬寶龍墨水筆....嘩，幾型呀(我心諗)！

入行幾年，事實同主觀願望總會有少少出入，歷史亦總係美好o既....我明o既我明o既....