誰來為中產出口氣？

曾特首視民望如浮雲的同時，昨天為"基層"市民開出一張110億的支票，體貼周到的照顧各位的衣食住行....

睇完新聞報導，其實大口仔想講粗口。我含辛茹苦咁日日死做爛做同屋企樓下個看更的返工時間一樣(朝8晚8、一對鐘)，你呢個X街大有為政府就同我放血咁放哂我的繳稅加預繳稅！

貨車司機上街抗議，你地減柴油稅....
漁民上街，你地減牌費、增資助....
雞農抗議，你加補償金....
連菲傭你地都要買佢怕？加外傭稅！

好！數目不大我都忍你。但今次你竟然夠膽死繼財政預算案後，再一次屈服於所謂民意，"開倉派米"110億。你可以每次都大有為，但換來的結果又點？借用明報新聞資料.....

新措施未能協助最有需要的「五無戶」
女兒不獲開學津貼，中產婦嘆百上加斤
55萬學生獲1000元津貼，家長嘆杯水車薪
僅綜援雙糧開學津貼受惠，單親母：一年多4500元，只幫少少
各黨支持紓困措拖，惟指無助長遠問題

你話大口仔偏激都係咁話，年初已經代交公屋租金一個月、加一個月綜援，昨天再代交兩個租金及多一個月綜援，又破天荒攪食物資助，做到真正的"開倉派米"。

敢問一句，政府係咪要中產養起所有綜援家庭？綜援家庭一年可以出十四個月糧？仲要嫌少？

大口仔唔反對支援低下階層，但政府開倉派米的同時，可唔可以同時檢討內地人士來港政策？點解內地夫婦在香港生仔，個小朋友自己可以領取綜援？政府可唔可以先檢討油公司、超市的壟斷情況，先考慮減油稅、派食物卷等等？

邊個可以為中產出口氣？出句聲？