無錢借

「老闆，係咪真係唔做？」我問。

「Tabo，你覺得借得過咩？楊生在國內房地產生意係唔錯，但國內房地產已經俾中國政府下了打壓令，楊生o係內地雖然大把地，但如果兩年內仲唔發展，隨時輸突兼拉人封舖。」我直屬老闆Mandy如是說。

Mandy三十出頭已經座上高位，一身職場武功非常利害，被我歸類為最危險老闆類型榜首....

最危險老闆類型榜首：三十過後未嫁得出或已離婚的單身女性
最危險老闆類型第二位：已婚女士但家庭內暫無及無打算有小朋友成員
最危險老闆類型第三位：男性老闆，不論單身或已婚
最安全的老闆類型：已婚女性，有小朋友需要照顧，加上母愛稍稍氾濫

不幸地，同Mandy合作兩年有多，佢仍然穩佔榜首位置， 絲毫沒有退居第二位的打算。

我正同Mandy討論一單在銀行業內蘊釀多時的銀團貸款，敝行暫時仲未表態參與，Tabo正努力為楊生爭取中，但形勢似乎唔太樂觀。

聽到Mandy講到楊生公司的營運風險，我不甘示弱反駁：「我睇楊生有心有力，私人身家豐厚，公司舊年又成功在香港上市，必要時國內公司需要錢咪伸手問香港股東集資，無問題！阿四叔都私人醒30億俾楊生，最近楊生仲有餘力投資瀋陽的爛尾樓，我覺得摶得過。」

「Tabo，清醒D，唔好俾表面野呃到。你有冇留意今次表示有興趣參與銀團貸款的銀行，一間中資行都無？你話中資行清楚楊生多D，定我地？」

「咁即係....？」

「咁即係楊生國內情況未必太樂觀，佢用上市公司股份做低押亦未必穩陣，反正最近銀行資本不足，唔夠銀借出街俾其他公司做生意，與其收楊生HIBOR加200-300點子，不如拆散筆錢借俾幾個本地大客好過。如果一個萬一，累銀行輸十億係咪你負責？」

「仲有一點我想補充.....」我負隅頑抗。

「手持楊生公司股票係咪要有智慧不如趁勢？」

「叻仔....！」Mandy以眼光表示讚賞同肯定我的答案。

終於都在最危險老闆榜首身上拎返一分....