大口仔投資週記 (2008年第29週)

2008年己經過左一半有多，投資環境越來越惡劣，最少一眾股海散戶們都係咁諗....

"兩美"倒閉？

過去一週最震撼的股市新聞，要選美國"兩美"傳出有倒閉危機。其實有幾多人知道"兩美"倒閉對全球金融體系有幾大影響？點解聯儲局棄不干涉美名都要向觀音(議會)借富去搶救"兩美"？可能知道答案的散戶根本唔多。

眾所周知，次按問題係今日股票市場動盪的主因，但受次按問題影響的金融機構，無論係真金白銀放款俾次按申請者的銀行如匯控、富國，定買入次按相關資產的投資銀行如美林、瑞銀，他們都是在清楚知道並衡量過有關風險後作出的做生意決定，其後引申出來的問題規模始終有限。

但假若"兩美"倒閉，其所發行的債券，過往因為其半官方身份而得到評級機構定為"AAA"級別債券，全世界不同的公司(私人機構、銀行)、政府(新加坡、中國政府)或私人投資者(你同我)因為其壞賬風險極低而大量買入。一旦"兩美"出現倒閉危機而美國政府見死不救，評級機構將其等級下調，在新的會計規定下，全世界不同的上市公司將要大幅撥備，影響非同小可。

今個星期初的股市急跌正正就係因為市場人士害怕惡夢成真的反應，故事發展下去會點？無人知！但從房貸美週五晚傳出希望透過投資銀行發行新股集資都唔情願接受政府救助，呢點證明左"兩美"似乎還有能力討價還價，情況未至於失制，大家要密切關注事態發展。

誰是受害者？誰是勝利者？

歐美金融機構相繼宣佈業績，富國銀行及美國運通的業績雖倒退但大幅好過預期，花旗銀行仍然錄得虧損但連繼第三季收窄虧損金額，只有美林仍然斯人獨憔悴，於第二季收窄虧損後又在第三季又再擴大到46.5億美金。

究竟今次由次按風暴引發的金融危機，誰是受害者？誰是勝利者？大口仔相信資金充裕，一路以來穩紮穩打地主力做傳統零售銀行生意的金融機構將會是最終的勝利者，筆者的愛股匯豐當然榜上有名，其餘富國銀行、渣打銀行亦會是今次"淘汰賽"當中的最大得益者。

至於美林、瑞銀、雷曼之流，最終可能有機會被其他勝利者伺機收購，或元氣大傷下需要多年時間休養生息然後重振雄風。但到時其他強者已經走得多遠呢？

資產分配進行情況

本週趁台灣股市進一步重創下，於週三用第三注資金買入"富達台灣基金"，最後一注資金計劃在台灣股市回落至6300點左右投入，完成對台灣的資產分配。