願死者安息

「做野o者，駛唔駛攞命？」"渣旗Sam"一手拎住杯Mocha，一邊壓低聲線講....

我今日Lunch後約了一個中環客在置地某辦公室開會，會議完結後無心情返公司搏命，於是第一時間打俾在中環返工的Sam，到中環人的"三點半茶水間"Starbucks一敍。

事實真係無心機做野，因為今日讀報知道有個行家因工作壓力太大自尋短見，過身了。

「有時真係唔知咁搏為乜？一年到晚為quota日出而作，日入而息，俾上司係咁捽，上司又俾老頂再捽。今年做得好咩？下年個quota襟計咯。」

「Sam，我都係咁話，有次見到我老闆Mandy同"頂爺"開完會，塊面黑過墨汁，之後無端端掉file、拍枱發自己脾氣，有時我都登佢慘。我都係應付佢一個o者，但佢上有"頂爺"，下有一班伙計跟佢搵食，壓力真係可想而知。」我一邊回想上次Mandy黑面事件，一邊如是說。

「Tabo，老闆唔易做呀！如果有日你做老闆，你一樣要面對同樣問題，但唔通你唔做？」

「有時人太好，真係未必適合做老闆，如果硬要將所有壓力一力承擔，對自己對同事都未必係一件好事。」

「不過，好人，一定值得我地尊重！」我同Sam差不多同一時間講出同一句說話。

之後，我同Sam有好一段時間相對無言，以不正式的方法，正式地為劉生默哀。

願死者安息。

R.I.P....